Kia Optima йўл-йўлакай ўзини қувватлайдиган гибридга айланди

Kia компанияси Чикаго автосалонига тўртинчи авлод Optima моделининг янги модификациясини олиб келди. Мазкур седан хўжалик электр тармоғидан қувват олиши мумкин бўлган биринчи Жанубий Корея гибридига айланди.

Асосий қувват қурилмаси таркибидан 156 от кучига эга икки литрли бензинли мотор, 50 киловаттлик электр двигатель ҳамда орқа ўриндиқлар остига жойлаштирилган 9,8 киловатт-соатлик литий-полимерли батарея жамланмаси ўрин эгаллади. Агрегатларнинг умумий қуввати 205 от кучига тенг.

Батареяларнинг 240 ва 120 вольтлик электр манбаидан тўлиқ қувват олиши учун мос равишда уч ва тўққиз соатдан камроқ вақт талаб қилинади. Гибрид фақатгина электр мотор билар ҳаракатланса 43 километр йўл босиши мумкин, аммо қурама тартибда 965 километргача йўл босиш мумкин.

Машина двигатели уч хил тартибда ишлай олади: тўлиқ электр (EV), гибридли (HEV) ҳамда “зарядловчи” (PHEV), яъни юқори тезликда ҳаракатланиш вақтида ишлаб чиқарилган энергия батареяга қайтиб тушаверади.

Янги автомобиль тормозланиш вақтида энергияни регенерация қилиш тизими, радиатор панжарасидаги фаол заслонка (қопқоқ) ва яхшиланган аэродинамика билан таъминланган. Олд томондан ҳаво қаршилиги коэффициенти 0,24га тенг бўлиб, ушбу кўрсаткич Tesla Model S`ники билан бир хил.

Kia Optima PHEV савдоси 2016 йилнинг иккинчи ярмидан бошланиши кутилмоқда.