Aсura автомобиллар учун футуристик панелни намойиш қилди

Шу йил бошида машҳур Aсura компанияси ўзининг Acura Precision Concept номли суперкарини намойиш қилган эди. Яқинда эса у Лос-Анжелесда (АҚШ, Калифорния) ўтказилган LA Auto Show кўргазмасида Aсura ушбу автомобилнинг асбоблар панелига монанд прототипни омма эътиборига ҳавола қилди. Панелга Acura Precision Cockpit номи берилган, унинг устки қатлами юқори сифатли металлдан, табиий ёғоч, тери ва синтетик замшдан тайёрланган, деб хабар бермоқда Daily Tech Info.

Светодиодли фон чироқлари ҳар бир элементни имкон қадар эстетик равишда ёритадиган қилиб созланган. Панелга ўрнатилган 12,3 дюймли экран унинг асосий компоненти ҳисобланади. У ҳайдовчига энг қулай шароитда кўринадиган соҳага жойлаштирилган. Дисплейнинг ранглари ҳаракат режимига қараб ҳайдовчи томонидан созланиши мумкин. Панелдаги фукнциялар трансмиссия ўрнатиладиган соҳа атрофида жойланган тачпад орқали бошқарилади.

Панелнинг компьютер тизими Android базасида ишланган Acura OS дастурида ишлайди. Дастур ёрдамида турли керакли иловалардан фойдаланиш мумкин. Аудио, об-ҳаво, билдиришнома ва навигация тафсилотлари марказий консолдаги қўшимча дисплейга чиқарилади.

Acura Precision Cockpit футуристик панели бундан бир неча йилдан кейин тайёрланадиган автомобилларга ўрнатилиши кутилмоқда.