Bentley Flying Spur W12 S – бақувват люкс

Париж автосалони бошланиши арафасида Британиянинг Bentley Motors компанияси ҳашамдор, кучли Bentley Flying Spur W12 S седанини намойиш этди. Бақувват седанга 626 от кучига эга бўлган 6.0 литрли, битурбо W12 агрегати ўрнатилган. Двигателнинг айланиш моменти – 820 Нм. Бу Flying Spur W12 моделига солиштирганда 10 от кучига ва 20 Нм айланиш моментига кўп.

Янги ҳашаматли седан максимум 325 км/ст тезликда ҳаракатлана олади. 4,5 сонияда 100 км/ст тезликка эришади. Компаниянинг таъкидлашича, Bentley Flying Spur W12 S максимум тезлиги соатига 200 милдан (321 км) юқори бўлган илк тўрт эшикли автомобиль саналади.

Седан тўлиқ узатмали тизимда ҳаракатланади, унга янги модификациядаги подвеска ўрнатилган. Бундан ташқари, тормозлар механизми ҳам композитли материаллар ҳисобига кучайтирилган. Ишлаб чиқарувчининг айтишича, оғир вазнга (2475 кг) қарамасдан, автомобиль тезлик борасида  унутилмас тассуротлар қолдиришга қодир.

Bentley Flying Spur W12 S аввалги версиялардан қуйма дисклар, қорайтирилган оптика ва кучайтирилган орқа бампер билан ажралиб туради. Салонга спорт руль чамбараги ўрнатилган, “W12 S” логотиплари ёпиштирилган.

Автомобилнинг сотуви шу йилнинг охирида бошланади. Ҳозирча моделнинг нархи маълум қилинмаган.