Bentley шиша консолли серҳашам кабриолетни намойиш қилди

Bentley Motors Женевада EXP 12Speed 6е концепт-карини тақдим қилди. Автомобилни серияли ишлаб чиқариш, ҳозирча, режада йўқ, аниқроғи унинг интерьер ва экстерьерига боғлиқ. Компания харидорларнинг ҳашаматли электромобилга бўлган қизиқишини ўрганиб, сўнг навбатдаги қадамни қўймоқчи.

EXP 12Speed 6е электромобилининг техник тавсифи аниқ эмас. Аммо компания машина Лондондан Парижгача зарядламасдан етиш мумкинлигига ишонтирди. Бу масофа 300 кмдан ошиқроқ.

Электромобилнинг ғаройиб янгиликлари бор. Масалан, марказий консол тўлалигича нафис эгилган шишадан ишланган бўлиб, OLED дисплейга эга. Унинг ёрдамида автомобилнинг барча тизимини бошқарса бўлади.

Ақл-идрокли ахборот-кўнгилочар тизим виртуал ёрдамчининг ўзидир. У орқали турли хизматларга уланса бўлади. Масалан, ресторанда столни банд қилиб қўйиш ёки авиачипта брон қилиш мумкин. Овоз ёрдамида бошқариш имкони бор.

Бундан ташқари рул чамбарагининг тепа қисмида икки тугма бор. Уларнинг бири босилса, машина бир зумдаёқ тезлик олади, иккинчиси тезликни чеклайди. Шаҳар ичида бу керакли функциядир.

Bentley серҳашам электромобиллар сегментини шакллантиришга ваъда берди.