Bentley янгиланган Mulsanne седанини намойиш этди

Bentley компанияси янгиланган Mulsanne седанини тақдим этди. Эндиликда моделнинг узайтирилган модификацияси ҳашамдор автоуловлар ишқибозларининг кўзларини қувнатадиган бўлди. Британ маркасининг флагман модели март ойида Женева автосалонида оммавий намойиш этилади.

Mulsanne Extended Wheelbase (EWB) номини олган узайтирилган седаннинг ғилдираклар базаси ҳажми 3266 дан 3516 миллиметрга қадар оширилган. Орқа ўринлиқлардаги оёқ қўядиган майдон ҳам 250 миллиметрга кенгайган. Харидорлар машина ҳаракатланиб кетаётганда тановвул қилиб олишлари учун махсус йиғиладиган столчага ҳам буюртма беришлари мумкин. Шунингдек, орқа ўриндиқдаги йўловчилар том қисмидаги алоҳида туйнук орқали теварак-атрофни кузатишларига шароит яратилган.

Булардан ташқари, Bentley Mulsanne EWB`да олти ўриндиқли, яъни орқадаги тўрт йўловчи бир-бирига қараб кетиши мумкин бўлган модификация ҳам мавжуд. Бундай талқин Grand Limousine by Mulliner номини олиб, фақатгина буюртма асосида тайёрланади.

Янгиланган Mulsanne`да Dunlop компанияси билан ҳамкорликда ишлаб чиқилган замонавий қопламалар қўлланилган бўлиб, улар шарофати билан салондаги шовқин даражаси 50 фоизга камаяди.

Орқа йўловчилар Android базасида ишловчи 10,2 дюймли планшет компютерларидан фойдаланишлари, улардаги олд камералар ёрдамида видеоконференциялар ўтказишлари ҳам мумкин.

Янгиланган Bentley Mulsanne савдоси 2016 йилнинг ёзидан старт олади. Седан нархининг қанча экани эса ҳозирча номаълум.