Блогер Тесла машинасининг "Ремонт"и қиммат экан деб ёқиб юборди(видео)

Финляндиялик блогер Туомас Катайнен ўзининг «Теsla Model S» электромобилини портлатиб юборди. Машина билан хайрлашиш ташландиқ карерда «тантанали тарзда, ўнлаб одамлар иштирокида бўлиб ўтди. «Теsla» рулига Ilon Маskнинг қиёфасидаги қўғирчоқни ўтқазиб қўйишди.

Кучли портлаш видеоси 17 декабр куни интернетда тарқатилди, бироқ 2013 йилда чиқарилган «Теsla» билан боғлиқ муаммолар Туомасда анча олдин пайдо бўлганди.

«Теsla»ни сотиб олганимдан сўнг дастлабки 1500 километргача яхши юрди, ажойиб машина эди. Кейин эса нуқсонлари чиқишни бошлади», — деди Катайнен.

Финляндиялик охири юришга ярамай қолган машинани эвакуаторда расмий дилернинг устахонасига олиб борди, бу ерда электрокар бир ойча турган. Бир ой ўтгач Туомасга машинанинг кафолат муддати тугаганини, аккумуляторлар блогини алмаштириш учун 20 минг евро тўлаши кераклигини айтишади. Блогер шунча пулни машина ремонтига сарфлагандан кўра, биратўла унинг баҳридан ўтиб қўя қолишни ма’қул топди.

Портлатилган машинадан бир уюм темир-терсак қолди, блогер уларни йиғиб керакли жойга топширишга кетди.

Видео