BMW савдоларнинг рекорд даражага чиққанини маълум қилди

Германиянинг автомобиль ишлаб чиқарувчи BMW компанияси 2018 йилнинг январь—июнь ойларида савдони 1,8 фоизга оширди ва 1,242 миллионта автомобиль сотди. Бу биринчи ярим йиллик учун рекорд ҳисобланади, деб ёзмоқда Daryo.uz.

BMW, MINI ва Rolls-Royce брендларини бирлаштирувчи автоконцерннинг савдолари июнь ойида 2,7 фоизга ўсиб, 238,92 мингта машинани ташкил қилган, бу натижа ҳам мазкур ой учун рекорд кўрсаткич саналади.

BMW электромобиллари савдоси июнь ойида йиллик ҳисобда 47,6 фоизга ўсган ва 13806 тани ташкил қилган. Йил бошидан буён компания 60,66 мингта электромобил сотган бўлиб, ўтган йилга нисбатан 42,5 фоизга кўп ҳисобаланди. Мазкур турдаги машиналар савдосининг ошиши BMW’га жорий йил охирига бориб 140 мингта электромобил сотишга имкон бермоқда.

BMW брендининг савдоси июнь ойида 200 мингталик маррадан ошиб, ўтган йилнинг шу ойига нисбатан тўрт фоизга кўпроқ бўлган. Йил бошидан буён бренд автомобилларининг савдоси икки фоизга ошиб, 1,059 миллион донага етган. Ўсиш барча минтақавий бозорларда қайд этилган.

MINI бренди савдоси июнда 3,8 фозига қисқариб, 37,96 мингтани ташкил қилган, биринчи ярим йилликда эса 181,43 мингта машина билан 0,1 фоиз ўсиш кузатилган.

Биринчи ярим йилликда Rolls-Royce бренди автомобилларининг савдоси 13,1 фоизга ўсган ва 1,781 мингтани ташкил қилган.