BMW янгиланган Х5 ҳақидаги сирларни очди

Бакир Назаров
16-06-2018

Янги авлод премиум-кроссовери ўзининг аввалги турларидан кўп жиҳатлари билан кескин фарқланади.

BMW компанияси ўзининг янги - тўртинчи авлод Х5 кроссоверини расман тақдим этди. Халқаро тақдимот эса ноябр ойига режалаштирилган. Шу сабабли янги кроссоверга қизиқиш билдирган харидорлар йил якунига қадар сабр қилишларига тўғри келади. Аввалги авлодлар каби янги BMW X5 АҚШнинг Спартенберг шаҳрида йиғилади.

Бир неча авлод алмашинувини бошидан ўтказган янги BMW X5 ҳажм жиҳатидан бир оз каттароқ бўлиши билан бир қаторда ўзига хос двигатель ва шассига эга бўлди. Ғилдирак айланаси 42ммга узунроқ, яъни 2975 мм. Автомобилнинг узунлиги 36 ммга (4922 мм), кенглиги 66 ммга (2004 мм), баландлиги 19 ммга (1745 мм)га ўзгартирилган.

Тўртинчи авлод BMW X5 капотини очсангиз, 462 от кучига эга саккиз цилиндрли V8 двигателига кўзингиз тушади. M50d, xDrive30d версияларида эса двигатель қуввати нисбатан бир оз кучсизроқ ишланган. Барча двигателлар 8 поғонали автомат узатмага эга.

BMW X5 стандарт кўринишда диодли фаралар, марказий назорат дисплейи ва кўрсаткичлар панелини ўзгартириш, амортизаторлар қаттиқлиги меъёрлаштиш имконини берувчи BMW Live Cockpit Professional тизимига эга. Қўшимча тўлов эвазига ишлаб чиқарувчилар панарама ойнакли том, мослашувчан M Professional подвескаси ва тўртта харакат режимидан бирини танлаш имконини берувчи xOffroad тизимини ўрнатиб беришлари мумкин.

Янги BMW X5 фаол яккатезлик, бошқарув ассистенти, йўлда қатор алмаштираётганда юзага келадиган хавфдан огоҳлантириш тизими, ён томондан бўлиши мумкин бўлган тўқнашувлардан сақловчи ассистент, ҳамда орқага ҳаракатланишда кўмаклашувчи дастур каби ҳайдовчи учун фойдали бўлган қўшимча имкониятларга эга. Орқага ҳаракатланишга кўмаклашувчи дастур юрилган сўнгги 80 метр масофани эслаб қолади ва ҳайдовчининг орқага ҳаракатланишига ёрдам беради.

Янги BMW X5нинг интерьери буткул ўзгача услубда тайёрланган. Салонга нигоҳ ташлаган киши ундаги ўзгаришларни тезда пайқайди. Асбоблар панели ва мультимедиа тизимини назорат қилиш учун иккита 12 дюмли дисплей ўрнатилган. Тизимнинг тўлақонли бошқаруви учун эса BMW Live Cockpit Professional тизими масъул. Бу тизим рулда жойлашган тугмалар орқали бир қанча вазифаларни амалга ошириш, сенсорли дисплей, қўл ҳаракати ва овоз орқали бошқарув функциялари тўғри ишлашини назорат қилади.