Chevrolet Malibu АҚШда йилнинг энг яхши модели номи учун курашади

23 маротаба ўтказилаётган “Шимолий Америкада йилнинг энг яхши енгил автомобили ва йўлтанламаси” (North American Car and Truck/Utility of the Year) танлови ташкилотчилари 2016 модель йилида ушбу танлов ғолиби бўлишга даъвогарлик қиладиган 6 та автомобиль номини эълон қилди. Танлов натижалари январда бўлиб ўтадиган Детройт автосалонида эълон қилинади. Енгил автомобиллар орасида йилнинг энг яхшиси номини олиш учун Chevrolet Malibu седани, Honda Civic оиласи ва 2015 йил декабрида “Япониянинг йил автомобили” деб топилган Mazda MX-5 родстери кураш олиб боради.

Энг яхши йўлтанламас унвонига сазовор бўлиш учун эса Япониянинг Honda Pilot ва Nissan Titan XD, шунингдек, Швециянинг Volvo XC90 автомобиллари беллашади.

Шимолий Америкада автомобилсозликка ихтисослашган 56 нафар журналист ва эксперт танловга ҳакамлик қилишади. Овоз бериш 4 январда бўлиб ўтиб, ғолиблар 11 январда эълон қилинади.

Эслатиб ўтамиз, 2015 йили ушбу танловда Volkswagen Golf йилнинг энг яхши енгил автомобили, Ford F-150 пикапи эса энг яхши йўлтанламас деб топилган эди.