Jeep еттита йўлтанламас нусхани намойиш қилди

1967 йилдан бери Юта штатининг Моаб шаҳри яқинида Пасха сафари ўтказилади. Йўлсиз шароитда машина ҳайдаш ишқибозлари ўзаро чақчақлашув учун сафарга отланишади. Тўққиз кунлик тадбир бу йили 19-27 март кунлари бўлиб ўтади. Пасха сафари доирасида Jeep маркасининг 75 йиллик тўйи ҳам ўтказилади.

Жип Mopar ательеси билан бирга автомобиль ишқибозлари учун етти нишона нусха тайёрлади. Булар: Jeep Crew Chief 715, Jeep Shortcut, Jeep Renegade Commander, Jeep Comanche, Jeep FC-150, Jeep Trailcat ва Jeep Trailstorm.

Барча нусхалар турли йилларда серияли ишлаб чиқарилган автомобилларни гавдалантиради. Тюнинг мобайнида автомобиллар кучайган, узайган ёки қисқарган, қўшимча қурилмалар ўрнатилган. Нишона нусхалар ўз навбатида чўнтаги бақувват мижозларга кўз-кўзлаш учун мўлжалланган.

Ҳар бир нусханинг ўз хусусияти бор. Масалан, Jeep Trailcat кучлилиги билан ажралиб туради – 717 от кучига эга.

Jeep Crew Chief 715 (чапда) Wrangler Unlimited русуми асосида ясалган. 1960-йилларнинг ҳарбий автомобилини гавдалантиради. Jeep Trailstorm (ўнгда) оддий декоратив элементларга эга.

Jeep Shortcut русуми Jeep Wrangler 66 смга қисқартирилганидир. Панжара, капот ва бампери ўзига хос.

Jeep FC-150 (тепада) 1956 йилда чиқарилган шу номдаги юк машинасининг янгича талқинидир. Jeep Comanche (чапда) пикапи эса Jeep Renegadeнинг узайтирилган кўринишидир. Jeep Renegade Commander (ўнгда) жиҳозлашда кўп меҳнат сарфланганлиги кўринишидан аён.

Jeep Trailcat етти русум орасида энг асови мана шу бўлади.