Москвада қайси автомобилнинг бозори чаққон?

Россиядаги икки корейс автомобили, яъни Kia Rio ва Hyundai Solaris харидорларнинг чўнтаги учун аёвсиз кураш олиб бормоқда. Яхши сотилиши бўйича улар орасидаги фарқ унча катта эмас.

“Автостат” агентлиги таҳлилчилари сентябр ойидаги машиналар савдосини ўрганиб чиқиб, Москванинг энг машҳур автомобилини аниқлашди. Ўтган ойда ҳамёнбоп Kia Rio седани 917 нусха сотилиб, энг харидоргир русум мавқеига эришди (ўтган йилнинг сентябрига нисбатан -21 фоизлик пасайиш). Августда байроқ “Солярис”да эди.

Hyundai Solaris сентябр ойи мобайнида 904та сотилди (-37 фоиз). Учинчи ўринда 673 дона сотилган Volkswagen Polo. Тўртликдан Hyundai Creta кроссовери ҳам жой олган бўлиб, у 532та сотилган. Бешинчида Skoda Octavia (519 дона сотилди).

Москваликларнинг хуш кўрган машиналари орасида Toyota Camry (502 дона), Skoda Rapid (454), Nissan X-Trail (360), Renault Duster (346) ва Toyota RAV4 (337) автомобиллари бор.

Ўтган йилнинг шу ойига таққослаганда савдо чўғи бир оз пасайган.