Немислар балиқдек силлиқ спорт автомобили ишлаб чиқаради

Opel компанияси GT купесининг нишона (концепт) нусхаси тасвирини ҳавола этди.

Бу русум 60-йиллардаги Opel Experimental GTнинг “набираси” ҳисобланади. Шу йилнинг мартида Женева автосалонида намойиш этилиши мўлжалланяпти.

Янги Opel GTнинг ташқи кўриниши Opel Monza нишона нусхаси услубида яратилган. Шу билан бирга Experimental GT асл спорткарининг элементлари ҳам мавжуд.

Opel GTга 1 литрли уч цилиндрли двигатель ўрнатилган. Бу мотор Adam, Corsa ва Astra русумларида қўлланган. 145 от кучига эга бўлиб, айлантириш моменти 205 Н·м. Айлантириш моменти олти поғонали кетма-кет узатмалар қутисидан (sequential manual gearbox) орқа ғилдиракка узатилади. Машина вазни бир тоннага бормайди, 8 сонияга етмай юз тезликка эришиши сабаби шундандир. Энг юқори тезлиги 215 км/соат.

Opel GTнинг кутилмаган опциялари бор. Эшик очилганида унинг бир қисми олд ғилдирак ёнига киради. Орқани кўрсатувчи кўзгу ўрнига камера ўрнатилган. Олд ойна панорамасимон томга уланиб кетади, ҳайдовчи йўлини матрицали диод фаралар ёритади.