Ravon Nexia’нинг комплектациялари маълум бўлди

Янги Ravon Nexia автомобилининг техник маълумотлари эълон қилинди. Daryo.uz’нинг Auto.mail.ru сайтига асосланиб хабар беришича, машина узунлиги 4330 мм бўлиб, кенглиги 1690 мм, баландлиги 1505 мм ва ғилдираклар базаси 2480 ммни ташкил этади.

Автомобиль бошланғич комплектациясида гидрокучайтиргич ва кондиционер йўқ. Юкхонаси салондан очилади, туманга қарши фаралари ва орқа чироғи, 14 дюймли ғилдирак дисклари бор. Оптимум версиясидан бошлаб битта ўт олдиргич калити ва эшиклар қулфи мавжуд. Элегант комплектациясида эса рул гидрокучайтиргичи, юкхонани ёритувчи чироқча, ягона ўт олдириш калити ва эшиклар қулфи, кондиционер, Clarion CD/MP3 автомагнитоласи, USB улагич, тўртта колонка бўлади.

100 км/с тезликка эришиши учун 11,9 сония талаб қилинади, 100 километрга шаҳар ичкарисида ёнилғи сарфи 7,7-8 литрни ташкил этади.

Автомобиль 1,5 литрли 4 цилиндрли DOHC двигатели билан жиҳозланган.

Аввалроқ янги Nexia’нинг нархи 379 минг рубл (6 минг доллар) дан 529 минг рубл (8 400 доллар)гача экани ҳақида хабар берган эдик. Ravon Nexia беш хил комплектацияда сотилмоқда: Comfort MT, Optimum MT, Optimum AT, Elegant MT, Elegant AT.

GM Uzbekistan компанияси 8 октабрь куни Москвада Uz Daewoo ўрнига келган янги Ravon бренди тақдимотини ўтказган эди.

Касодга учраган корейс автомобиль ишлаб чиқарувчисининг эгасига айланган General Motors бу бренддан воз кечган. Daewoo’нинг эски моделларини ишлаб чиқарувчи Асака заводи, махсус битимга мувофиқ, бу маркадан хорижга ўз маҳсулотларини экспорт қилишда фойдаланиб келаётган эди. Брендга бўлган эгалик ҳуқуқи 2006 йилдан бери Daewoo Internationalга тегишли бўлиб, у Саудия Арабистонида ҳам шу номда машина ишлаб чиқариш истагини билдиргани боис GM Uzbekistan’дан ортиқ бу бренддан фойдаланмасликни сўраган.

Энди ўзбекистонлик автомобиль ишлаб чиқарувчининг маҳсулотлари хорижда Ravon бренди остида сотилади.

Ravon Nexia’нинг барча комплектациялари ҳақида тўлиқ техник маълумот билан Ravon сайтида танишишингиз мумкин.