“УзАуто Моторс"да Россия автогиганти мутахассиси иш олиб боради

“АвтоВАЗ"нинг собиқ мутахассиси “УзАуто Моторс"нинг маркетинг бўйича директори бўлди

Бунгача Александр Бредихин 15 йилдан ортиқ вақт давомида Россия автогигантининг маркетингига раҳбарлик қилган.

“АвтоВАЗ"нинг собиқ топ-менежери Александр Бредихин “УзАуто Моторс"нинг маркетинг директори бўлди. Бу ҳақда “Российская газета” унинг Facebook'даги саҳифасига таяниб хабар берди.

“Мана, бу янги бурилиш. Кечадан бери мен „УзАвто Моторс“ компаниясининг Тошкентдаги офисида маркетинг бўйича директор бўлиб ишлаяпман”, деб ёзади Бредихин.

Нашрнинг ёзишича, 2021 йил августида “УзАуто Моторс” бош директори лавозимига тайинланган Бу Андерссон уни Ўзбекистонга таклиф қилган. Бунгача у 2013−2016 йилларда Волжский автомобил заводини бошқарган.

Бредихин “АвтоВАЗ” тузилмаларида деярли бутун фаолияти — 1984 йилдан бошлаб 37 йил давомида ишлаган. 2003 йилда у Россия автогигантининг маркетинг бошқарувига кирди.

Хусусан, Бредихин Лада дилерлик тармоғининг ребрендингига масъул эди. 2017−2021 йилларда “АвтоВАЗ"ни тарк этишдан олдин у Лада-Сервис компаниясининг хизмат кўрсатиш ва савдо тармоғига раҳбарлик қилган.

Нашрнинг ёзишича, “УзАуто Моторс” компаниясининг маркетинг бўйича директори лавозимига россиялик мутахассиснинг жалб этилиши Андерссон Россияга экспортни компания ривожланишининг асосий омилига айлантиришидан далолат беради.