Avtoishqibozlarga qanday sovg‘a bеrgan ma’qul?
Hayotda kim bo‘lishidan qat’iy nazar, yetti yoshdan yetmish yoshgacha bo‘lgan har bir inson turli sanalar va voqealar munosabati bilan yaqinlariga unutilmas sovg‘alar qilishni yoqtiradi. O‘z o‘rnida ulardan ham ana shunday sovg‘alar olishni istaydi. Biroq shuni unutmasligimiz kerakki, yoshimiz ulg‘aygani sari sovg‘alar ham «ulg‘ayib» boraveradi. Masalan avtomobillarni yoqtiradigan bolaga yoshligida yaqinlari tomonidan qilingan o‘yinchoq o‘t o‘chirish mashinalari yoki poyga avtomobillari rusumlari bir olam quvonch bag‘ishlagan bo‘lsa, vaqt o‘tib ulg‘ayganidan so‘ng, bunday sovg‘alar unga kerak bo‘lmay qoladi.
Demak har bir sovg‘aning o‘z o‘rni va tortiq qilinadigan vaqti bor. Bu jihatdan olib qaraganda, yaqin insonlariga sovg‘a olish borasida har bir inson bosh qotiradi. Biroq avtoishqibozlar uchun sovg‘a tanlashda bosh qotirish shart emas. Ularga xuddi bolalikdagi kabi bir olam quvonch bag‘ishlaydigan ko‘ngilochar va foydali sovg‘alar haqida esa ushbu maqolamizda bilib olasiz.
Sayohatga o‘ch avtoishqibozlar uchun sovg‘alar
Bunday insonlar doim yo‘lda o‘zlarining asosiy vaqtlarini o‘tkazishadi. Shu bois, avtomobil ular uchun nafaqat harakatlanish vositasi, balki ikkinchi uy ham hisoblanadi. Ular avtomobilda turli elektron qurilmalarni quvvatlantirishga, ovqatlarni saqlash va olib yurishga, kiyim hamda boshqa kerakli narsalarni avtomobilda saqlashga, hattoki, zaruriyat bo‘lganda avtomobilda tunashga ham ehtiyoj sezishadi. Bunday insonlarga sayohatning juda qulay o‘tishini ta’minlovchi har qanday avtomobil jihozlari: termokrujkalar, termos, muzlatgich sumkalar, ixchamgina yostiqchalar, avtomobil belkuragi, GPS-navigator, o‘rindiqlarni isitgich va shu kabilar, aynan ko‘ngildagi sovg‘a hisoblanadi.
Ulardan ayrimlari, misol uchun termokrujka, isitgich, fonar nafaqat sayohatni hush ko‘ruvchi avtohavaskorlarga, balki asosiy vaqtini avtomobil boshqarish bilan o‘tkazadigan aksariyat haydovchilarga ham asqotadi. Yana bir shunday sovg‘alar toifasiga kiruvchi ajoyib narsa – bu uskunalar paneliga qo‘yiladigan gilamcha - (avtomobilnaya lipuchka) bo‘lib, uncha katta bo‘lmagan bu gilamchaning bir tarafi avtomobil salonida haydovchiga qulay joyga yopishtiriladi. Misol uchun uskunalar paneliga. Uning boshqa tarafiga esa haydovchining qo‘l ostida turishi lozim bo‘lgan narsalarni biriktirib qo‘yish mumkin. (Qo‘l telefoni, kalitlar, yozuvchi buyumlar va hokazo)
Havaskor avtoustalar uchun sovg‘alar
Avtoishqibozlar orasida shunday toifadagi insonlar borki, ular doimo o‘z avtomobillarini yanada mukammallashtirish yoki texnik ta’mirlash ishlari bilan band bo‘lishadi. Bu kabi insonlarga avtomobildagi nosozliklarni tuzatish, ularni hosil bo‘lishdan oldin aniqlash va bartaraf etish rohat bag‘ishlaydi. Shuning uchun ular tez-tez o‘z vaqtlarini garajda dvigatel ta’mirlash yoki o‘z avtomobillarining elektron jadvalini o‘rganish bilan o‘tkazishadi. Bunday avtoishqibozlarga esa albatta, zamonaviy ta’mirlash qurollari to‘plami, avtokompressor yoki so‘nggi rusumdagi avtomobil odeyallari (avtoodeyalo) munosib sovg‘a bo‘ladi.
Tozalikni xush ko‘ruvchi avtomobilsozlar uchun sovg‘alar:
Siz sovg‘a bilan siylamoqchi bo‘lgan tanishingiz tozalik va tartibni yoqtiradigan bo‘lsa, u holda unga avtomobilda bunday holat hukmron bo‘lishini ta’minlaydigan jihoz (devays)lar juda ham ajoyib sovg‘a bo‘ladi. Masalan, bu avtomobillar uchun mo‘ljallangan changyutgich bo‘lishi mumkin. Bugungi kunda ushbu qurilmaning har biri o‘ziga xos funksiyalarni o‘zida mujassamlashtirgan ko‘plab turlari bor. Ozodalikni xush ko‘ruvchilar uchun yana avtomobil uchun mo‘ljallangan sayqal berish vositalari (polirollar) ham juda munosib sovg‘a bo‘ladi. Havo tozalovchi vositalarni ham bunday sovg‘alar sirasiga kiritish mumkin. Sifatli muqobil havo tozalagichlar avtomobil ionizatorlari hisoblanadi.
Avtomobil salonida bunday vositalarning mavjudligi nafaqat haydovchilarga, balki yo‘lovchilarga ham birdek xush yoqadi. Chunki avtomobil ionizatorlari salondagi havoni turli yoqimsiz hidlardan, balki changdan ham tozalaydi va yopiq avtomobil salonida havo oqimini to‘g‘ri yo‘lga soladi.
Texnik yangiliklarni qadrlovchi avtohavaskorlar uchun sovg‘alar
Nafaqat o‘z avtomobilini, balki turli ko‘rinishdagi texnik ishlanma va yangiliklarni yoqtiruvchilar uchun nima sovg‘a qilish mumkin? – degan savolga esa javob berish biroz murakkabroq. Chunki avtomobillar uchun mo‘ljallangan zamonaviy elektron qurilmalar va turli yangiliklarning narxi anchagina baland. Bular avtomagnitafon, DVD-proigrivatel, radar detektor va videoregistratorlardir. Eng asosiysi, siz tanlayotgan bunday qurilmalar sifatli va haydovchining did va qarashlariga mos bo‘lsin.
Ayol avtoishqibozlar esa avtomobil saloni uchun mo‘ljallangan ichki bezaklarga alohida e’tibor bilan qarashadi. Biroq yuqorida aytib o‘tgan sovg‘alarni aynan ular uchun ham tanlasak bo‘laveradi. Agar siz ayol haydovchilar uchun sovg‘a qilmoqchi bo‘lsangiz, bu albatta, avtomobilning old oynasiga yopishtiruvchi moslama o‘rnatilgan ayiqchalarni xarid qilish degani emas. Avtomobil boshqaruvchi xotin-qizlar ham termokrujka, yopishqoq gilamcha va sifatli magnitafonlarga ehtiyoj sezishadi va bunday sovg‘alarni yaqinlaridan olish ular uchun ham yoqimlidir.