Автомобилингизни интернет орқали сотмоқчимисиз? Қуйидаги қоидаларни эсда тутинг

Ҳеч биримизга сир эмаски, бугунги кунда биз учун одатий бўлган савдо-сотиқ, бозор тушунчаси анча тараққий этиб, ижтимоий тармоқларда, махсус сайтларда ҳам ўз фойдаланувчиларига эга бўлиб улгурди. Таъкидлаш жоизки, айнан интернет орқали ўзингиз учун зарур бўлган харидни амалга ошириш ёки бирор ортиқча буюмингизни сотиш анча қулай бўлиб қолди. Шунингдек, бугунги кунда автомобилларнинг олди-сотдиси учун бозорга чиқишга эҳтиёж қолмади. Бунинг учун бир қанча сайтлар хизмат кўрсатиб турибди.

Энди тасаввур қилайлик. Сиз ҳам ўз автомобилингизни сотмоқчисиз. Бунинг учун сиз айнан ўша сайтларга эълон беришингиз, техник маълумотларни маълум қилишингиз ва албатта потенциал харидорга қулай бўлиши учун автомобилингизнинг фотосуратларини илова қилишингиз керак. Хўш, бунинг учун нималарга эътибор қаратган маъқул?

5 та асосий қоидаларга тўхталиб ўтамиз.

1. Нечта фотосурат жойлаган маъқул?

Илова қилинадиган фотосуратлар 5тадан кам бўлмаслиги керак. Кузовнинг олд ён томони, кузовнинг орқа ён томони, салоннинг олд панели, мотор қисми ва салон интерьери ҳамда ўриндиқлари. Ўриндиқда бирор буюмингиз бўлмагани маъқул. Булар автомобилни харидорга таништириш учун зарур бўлган минимум талаблар. Агар чиндан ҳам автомобилингиз яхши бўлса, шу фотосуратларнинг ўзидаёқ харидор топилади. Автомобилни ҳар томондан кўришнинг имкони мавжудлиги, кутилаётган харидорнинг вақтини иқтисод қилади.

Бешта суратни олган одам учун ундан ҳам кўпроқ суратлар олиш қийин иш эмас. Автомобилни ҳар томонларидан суратга олаверинг. Фақат фотосуратлар бир хил бўлиб қолмаслигига ҳушёр бўлинг. Бўлмаса сизнинг эълонингизни кузатаётган потенциал харидор зерикиб қолиши мумкин.

Кўпинча автомобил ғилдираги камера томонга бурилган ҳолда суратга олинганига гувоҳ бўламиз. Бу унча чиройли эмас. Яхшиси, ғилдиракни алоҳида суратга туширинг.

2. Суратга олишнинг асосий қоидалари

Фотосуратда кузовнинг кир ҳолатда бўлмаслиги мақсадга мувофиқ, лекин ҳамма ҳам бу қоидага риоя қилавермайди. Бу яхши эмас. Суратни куннинг ёруғ вақтида олган яхшироқ. Бўлмаса харидор сотувчи ниманидир яширяптимикан деган шубҳага бориши мумкин. Автомобилни кадрга тўлалигича сиғдиришга ҳаракат қилинг. Акс ҳолда, тўла кўринмаган кузов қандайдир муаммони яшираётгандай таассурот уйғотиши мумкин.

Суратга олиш учун кенг жой танлашга эринманг. Масалан автомобиллар турар жойи энг мақбул танлов. Агар суратни табиат қўйнида олсангиз, янада яхши. Олинган фотосуратларни фотошопда таҳрирлашга шошилманг. Таҳрирлаш доим ҳам кутилган натижани беради, деб бўлмайди. Чунки кўпинча таҳрирланган фотосурат аслидагига нисбатан ноодатий кўринишда бўлади ва харидорларнинг асоссиз шубҳаланишига сабаб бўлади.

3. Автомобил кузовидаги ва салондаги камчиликларни суратга тушириш керакми?

Агар сиз эълон бераётганда автомобилдаги мавжуд камчиликлар ҳақида тўхталиб ўтган бўлсангиз, унда буни фотосуратда алоҳида илова қилишингиз мумкин. Борини яширмасдан айтиш орқали сиз бир томондан ростгўй инсон сифатида харидорларнинг қизиқишини уйғотасиз, бошқа томондан ўзингизнинг ҳам, харидорнинг ҳам вақтини тежайсиз. Мавжуд камчилик автомобилнинг айнан қайси қисмида эканлигини изоҳи билан кўрсатиб ўтсангиз ҳам бўлади.

4. Кўрсаткичлар панели: автомобил ўт олган ҳолда бўлгани яхшими ёки...?

Бир томондан кўрсаткичлар панелини суратга олаётганда автомобилни ўт олмаган ҳолда турган яхшироқ. Чушки ўт олган автомобилнинг кўрсаткичлар панелидаги чироқлар фотосуратнинг сифатини бузиши мумкин. Бошқа томондан чироқларнинг ёниқ тургани, масалан, CHECK белгисининг ёниб қолганми ёки йўқми деган, техник муаммо билан боғлиқ саволга жавоб олишга ёрдам беради. Лекин, буни фойдадан кўра кўпроқ зарарли томони кўпроқ. Аввал айтганимиздай кўрсаткичлар панелининг чироқлари ёниқ ҳолда туширилган сурати харидорда у қадар яхши таассурот қолдирмайди.

5. Суратга олишдан аввал машинанинг мотор қисмини ювиш керакми?

Мотор қисмининг ювилган ҳолатда бўлиши, кўпинча, харидорларнинг ишончини йўқотиб қўйишингизга сабаб бўлиши мумкин. Улар мотордаги қандайдир камчиликларни, масалан оқиб қолган ёғ изларини ёки бошқаларни беркитиш учун ювиб олибди деб ўйлашлари мумкин. Шу сабабли бир оз чанг теккан лекин қуруқ мотор кўпчилик томонидан яхши қабул қилинади.

Қўшимча маслаҳатлар

Агар сиз хавфсизлик камарини ўриндиқ орқасига ўтказиб қўйишга одатланган бўлсангиз, суратга олишдан олдин уни рисоладагидай қилиб қўйишни унутманг. Имкон қадар салонда мавжуд камчиликларни йўқотинг. Сотишдан аввал, ечиб олишни мўлжаллаётган қурилмаларни суратга туширмай туриб ечиб олинг.

Яна ҳам содда қилиб айтадиган бўлсак автомобилингизни бозорга сотиш учун олиб чиқаётганда қандай эътибор қаратадиган бўлсангиз, бунда ҳам худди шундай қилинг.

Хулоса қиламиз

 Ҳар хил кўринишда ва камида 5та фотосурат жойланг;

• Автомобил тоза бўлсин. Ёруғликка эътибор қаратинг;
• Камчиликларни суратга олиш ва изоҳлашни унутманг;
• Зарур бўлсагина моторни ювилган ҳолда суратга олинг;
• Автомобилни сотаётганингизда ечиб олишни режа қилган жиҳозларингизсиз тақдим этинг.

auto.mail.ru асосида Баҳром Аббосов тайёрлади