Энг арзон автомобиль ҳеч кимга керак эмасми?

Ҳиндистоннинг Tata Motors автомобилсозлик компанияси митти Nano русумини келаси йилда ҳам ҳозиргидек кўринишда чиқариб бўлмаслигини тан олди. Чунки дунёдаги энг арзон автомобиль дея шов-шув қилинган Nano русумини харидорлар талашиб кетмади. Bloomberg маълумотига кўра шу йилнинг июнь ойида бор-йўғи битта “Нано” ишлаб чиқарилган, экспортга эса умуман кетмаган. Ўтган йилнинг июнида конвейердан 275та “Нано” чиққан, уларнинг 25таси экспортга кетганди.

Митти хэтчбекнинг бозори юрмаслиги Ҳиндистон автомобиль бозорида ўсиш манзараси билан бир вақтда кетмоқда. Маҳаллий таҳлилчиларнинг фикрича, ҳиндистонликлар машина танлашда диди нозиклашиб қолган ва нархига қарамай харид қилмоқда.

Tata Nano 2008 йилда Ҳиндистон автобозорига чиққан бўлиб, нархи ўшанда 1,5 минг доллар эди. Вақт ўтган сари қимматлашиб, 3435 долларгача кўтарилди. Машинага 0,6 литрли, қуввати 38 от кучига тенг мотор ўрнатилган. Nano 2015 йилда замонавийлаштирилди ва роботлаштирилган трансмиссияга эга бўлди.

Арзоннинг шўрваси татимас деганларидек, Nano тўқнашув тестларида ёмон натижалар кўрсатган, тасодифан ёниб кетиш ҳолатлари ҳам учраган.

Кейинроқ Ҳиндистон бозорида Bajaj Qute “Нано”нинг рақобатчиси сифатида пайдо бўлди. Узунлиги 2752 мм бўлган пластик кузовли автомобилда 13,5 отнинг қуввати бор. 400 кгли автоквадроцикл соатига 70 км тезликда ҳаракатлана олади. Унинг нархи 2 минг доллардан сал камроқ. Албатта, Nanoнинг омадсизлигида Quteнинг ҳиссаси бўлиши мумкин.