Энг хавфсиз автомобиллар рейтингида етакчи ўзгарди

Американинг нуфузли нашри Consumer Reports ишончли автомобиллар рейтингини эълон қилди.

Бу йили биринчи ўрин бир поғона кўтарилган Toyota маркасига насиб қилди. Экспертлар автоҳаваскорларнинг фикр-мулоҳазаларига таяниб “Тойота”нинг 14та русумини таҳлил қилиб чиқди. “Энг ишончли” унвони 86 купега берилди.

Рейтингнинг иккинчи поғонасини ҳам “япон” банд қилди. Айтиш жоизки, Lexus шоҳона маркаси охирги уч йилда бу рўйхатда биринчиликни бировга бермаганди. Айниқса, ES седани хавфсизларнинг хавфсизи деб топилди.

Учинчи “хавфсиз” эса корейсларнинг Kia маркаси бўлди. “Киа” ўтган йилгидан икки поғона илгарилади. Niro компаниянинг энг хавфсиз русуми деб топилди.

Тўртинчи ва бешинчи ўринлар немисларга насиб қилди. Audiнинг Q3 кроссовери тўртинчи бўлса, BMW нинг купеси хавфсизлик бўйича бешинчи ўрин соҳиби бўлди.

“Хавфсиз”лар ўнлигига Subaru, Infiniti, Buick, Honda ва Hyundai маркалари ҳам кирди.

Экспертлар ҳаммаси бўлиб 400 минг муштарий юборган 640 минг автомобилга оид маълумотларни таҳлил қилди.