Франкфурт автошоусидаги энг қўрқинчли автомобиль

Германиянинг Франкфурт шаҳрида давом этаётган автокўргазмада қиммат ва ҳашаматли кўплаб кроссоверлар намойишга қўйилган. Масалан, Bentley Bentayga, Audi E-Tron Quattro электромобили ёки Brabus G 500 4×4² энг кўп тилга олинаётган моделлардан. Салонда шундай автомобиллар ҳам борки, улар фақат махсyс дидли мижозлар учун ишлаб чиқарилган.

Шундай машиналардан бири “AG Excalibur” компанияси тақдим этаётган Alligator йўлтанламасидир. Тимсоҳ дея аталган бу модел, кўплаб кузатувчилар назарида, қўрқинчли дизайни билан ажралиб туради.

Улкан бамперлари, рекорд даражадаги аэродинамикани берувчи ҳаво ўтказгичи, радиатор олдидаги баҳайбат пўлат панжара ҳамда 26 дюймли дисклар ушбу автомобилни катта йўлда ҳамманинг эътиборини торта оладиган даражадаги антиқа моделга айлантирган.

Аллигатор BMW X6 русуми асосида тайёрланган. Латвияда жойлашган “AG Excalibur” компанияси мижозларнинг индивидуал буюртмасига кўра, бошқа моделларнинг дизайнини ўзгартириб, янги кўриниш ва эксклюзив брендга айлантириб беради.

Компания дизайнери Глеб Шегловнинг айтишича, “тимсоҳ” автомобиль россиялик бир бой мижознинг буюртмаси асосида тайёрланган.

Мaшина дизайни бутунлай ўзгартирилган. Рул янгиланган, тормоз меxанизми яхшиланган ҳамда ички қопламаларда тимсоҳ терисини эслатувчи махсус чармлардан фойдаланилган.

Автомобилнинг механик қисмларида ўзгариш йўқ. Унда BМW Х6нинг 3 литрли ва 249 от кучига эга дизелли мотори қолдирилган.

BМW Х6 русумини “тимсоҳ”га айлантириш 170 минг еврога тушади.