Honda янги Freed’нинг суратларини эълон қилди

“Хонда” компанияси иккинчи авлод Freed компактвэнининг бир жуфт янги суратларини эълон қилди ва унинг двигателлари ҳақидаги маълумотларни улашди, дея хабар бермоқда “Колёса”.

Модель дизайни Honda’нинг ўзига хос услубида ишлаб чиқилган. Хусусан, Freed’га “Хонда”ларга хос радиатор панжараси ва ёруғлик диодли ёритгичлари бор асосий чироқ ўрнатилган. Компактвэннинг орқа чироқлари шакли ҳам ўзгарган.

Янги Freed Японияда ҳажми 1,5 литр бўлган DOHC i-VTEC бензинли мотори ва Sport Hybrid i-DCD гибрид юргизгичи билан сотилади. Гибрид юргизгич ҳажми 1,5 литр бўлган двигатель ва электромоторни ўз ичига олган. Двигателларнинг қуввати ҳақида ҳозирча ахборот йўқ.

Кейинроқ Freed’га ўрнатилиши мумкин бўлган моторлар қаторида ҳажми бир литр, қуввати 128 от кучига тенг турбодвигатель пайдо бўлиши кутилмоқда — худди шундай юргизгич Европада сотиладиган янги авлод Civic’ларига ҳам ўрнатилади.

Янги автомобилнинг расмий тақдимоти 2016 йилнинг июль ёки август ойида бўлиб ўтади, сентябрдан бошлаб эса дилерларга етказиб бериш бошланади. Биринчи авлод Freed’лар Япониядан ташқари Индонезия, Малайзия ва Сингапурда сотиларди. Янгиси эса, катта эҳтимол билан, Хитойдаги харидорларга ҳам таклиф қилинади. Боз устига, бу модель Хитойнинг ўзида ишлаб чиқарилиши ҳам мумкин.