Латвия фирмасининг автомобилига жаҳондаги энг қиммат руль ўрнатилди

Риганинг Dartz Motorz компанияси Black Alligator (“Қора тимсоҳ”) номли қимматбаҳо йўлтанламас ясади. Аввалроқ компания Prombron Black Snake (“Қора илон”) ва Prombron Black Shark (“Қора акула”) автомобилларини тақдим этганди. “Қора тимсоҳ”ни Ҳиндистонлик мижоз буюртма бергани айтилмоқда.

“Қора тимсоҳ” асосида кузови ва салони янгиланган Mercedes-AMG GLS 63 ётибди. Салонга тимсоҳ териси қопланган, айрим жойлари, хусусан, рулига скат териси сирилган. Автомобилнинг ўзи бир ён бўлса, рули бир ён. У дунёдаги энг қиммат руль сифатида Гиннес китобига кириши мумкин. Чамбаракка қатор қора олмослар ва икки ёқут қадалган. Босиш тугмаси тилладан, Dartz Motorz логотипи эса оқ олтиндан ясалган.

Бошқа ҳашаматларидан калитлар сақлагични санаб ўтиш мумкин, у кўпроқ декоратив ашёни эслатади. Автомобиль баҳоси, ҳозирча, сир, аммо олти нолли сон бўлиши аниқ.

Тасдиқланмаган хабарга кўра, Dartz Prombron Black Alligator серияли ишлаб чиқарилган йўлтанламаслар ичида энг бақувватидир. Атрофлича ишлов берилганидан сўнг двигателининг қуввати бир ярим минг от кучига етган.

“Қора тимсоҳ” серияли ишлаб чиқариладими-йўқми – номаълум. Dartz, одатда, чекланган нусхада машина чиқаради. Масалан, Dartz Prombron Black Shark ўнта ясалган. Демак, “Қора тимсоҳ” ягона нусхада қолишини истисно қилиб бўлмайди.