Малайзиянинг автомобиль ва мотоцикллари

Малайзия фақатгина турли технологик қурилмаларни йиғиш билан шуғулланмасдан бинойидек автомобиль ва мотоцикллар ишлаб чиқаради. Малайларнинг Proton маркаси ҳақида кўрган-эшитганлар бор. Аммо улар фақат “Протон” ишлаб чиқармаган.

Бу давлатнинг маҳсулотларида ўрта асрнинг архаик анъаналари замонавий технологиялар билан уйғунлашган. Автомобиль саноати ҳали ёш бўлишига қарамасдан кўплаб Осиё мамлакатлариники каби қизиқарлидир.

Proton Iriz

Келинг, Малайзиянинг дунёда озми-кўпми танилган ягона маркасидан бошлаймиз. Бу, албатта, Proton. Расмда 2014 йилда чиқарилган Proton Iriz. “Протон” маркасига 1983 йилда миллий автомобилсозликни ривожлантириш ва саноатни юксалтириш дастури доирасида асос солинган. Унинг асосчиси 1981-2003 йилларда мамлакатнинг бош вазири лавозимида ишлаган Махатхир Муҳаммад саналади.

Bufori Geneva

Bufori компаниясига 1986 йилда асос солинган бўлиб, кам серияли олий синф автомобиллари, спорткарлар ва эски русумларга тақлидий автомобиллар ишлаб чиқаришга ихтисослашган. Расмда 2010 йилда чиқарилган Bufori Genevaни кўриб турибсиз.

Perodua Axia

Proton хорижда ҳам танилган бренд эканлигига қарамасдан мамлакатдаги энг йирик автокомпания у эмас. Малайзиянинг энг йирик автобренди Perodua. Компания 1992 йилда Daihatsuнинг йиғув корхонаси сифатида иш бошлаган, сўнг оригинал автомобиль ясашга ўтган. Perodua хорижга жуда кам чиқарилади. Расмдаги 2014 йилда чиқарилган Perodua Axia.

Naza Citra

Naza турли автомобиль маркаларининг жуда катта дилеридир. Бундан ташқари Peugeot ва Kia автомобилларини йиғади ҳамда ички бозор учун ўз русумини ишлаб чиқаради. Расмдаги Naza Citra (Kia Carensнинг иккинчи авлоди).

TD2000

1986 йилда ретро-автомобиллар тайёрловчи кичик TD Cars фирмаси ташкил этилган. Унинг асосий русуми родстер TD2000 расмда акс этган.

Inokom Lorimas

Inokom малай бренди, унинг остида ички бозор учун Hyundai фаолият юритади. Расмдаги Inokom Lorimas, 2002 йилда ишлаб чиқарилган Hyundai Porterнинг малайча варианти.

HICOM Perkasa

HIKOM бренди остида эса 1994 йилдан бери Малайзияда Isuzu ишлаб келади. HIKOM ҳам “Мерседес” ва “Митсубиси” русумларини йиғади. Расмда HICOM Perkasa юк автомобили. У Японияда Isuzu Elf номи билан танилган.

Modenas Dinamik 120

Малайзияда автомобилгина эмас, мотоцикллар ҳам ишлаб чиқарилади. Йирик мотоциклсоз компаниясининг номи Modenas бўлиб, у 1995 йилда ташкил этилган. Асосан кичик мотоцикллар ва мопедлар чиқаради. Modenas Dinamik 120 мотоциклини расмда кўриб турибсиз.

DefTech AV8 Gempita

DefTech мудофаа соҳасига маҳсулот етказиб берувчи компаниядир. DefTech танк ва зирҳли машиналар ишлаб чиқаради. Шу билан бирга фуқаролар учун HICOM автобуслари ва юк машиналарини йиғади. Расмда DefTech AV8 Gempita (2014) бронетранспортёри.

Petronas FP1

Энг охиргиси Малайзиянинг йирик компанияси Petronasга тегишли. 2003 йилда компания FIM Superbike чемпионатида ўз бренди билан қатнашмоқчи бўлди, аммо Superbike қоидасига кўра қатнашувчи мотоцикллар камида 150 серияда ишлаб чиқарилган бўлиши зарур эди. Шу боис фақат пойгада қатнашиш учун Petronas FP1 минимал адад билан мотоцикл чиқарди. Ундан юзтаси сотилди. 2006 йилда “Супербайк” лойиҳаси тўхтатилди.