Машинани муваффақиятли сотиш йўллари

Машинангизни сотмоқчимисиз? Машина бозоридаги нархларни суриштириб қолдингизми? Сизга тажрибали мутахассисларнинг маслаҳатларини ҳавола қиламиз. Ўқинг, асқотиши тайин.

Нима қилиш керак?

1. Аввало, машинанинг асл баҳосини аниқ билиб олиш керак. Европа ва Америкада автомобилнинг ишлаб чиқарилган йили ва босган йўли асосида нархи пастлаш коэффициентлари жадвали бўлади, бизда эса “бозор ўйнаб туради”. Бир авто русуми нархи кескин тушиб кетса, иккинчисиники кутилмаганда кўкка ўрлаши мумкин. Энг осони интернет майдончаларидаги эълонлардан машинанинг асл нархини аниқлаб олишдир. Сизга бу борада, аввало, carzone.uz сайтини тавсия этамиз, зотан, сайтимиз салонлардаги нархларнигина эмас, бозор нархларини ҳам мунтазам эълон қилиб бормоқда. Автомобилингизни сотиш эълонини қўйиш учуна torg.uz, zor.uz, car.uz, avtobor.uz каби сайтлар бор. Улардан аниқ биттасини ажратиб кўрсатмаймиз.  Исталган биридан фойдаланишингиз мумкин.

2. Машинангизни бозорга тайёрлаш керак. Азалдан, маҳсулотни бозорга ювиб-тараб олиб чиқилади. Кўчада нима кўп – машина ювиш хизмати кўп, уларга ташриф буюринг. Шу билан бирга кузовни бир оз сайқаллаш (полировка) керак, бу машинадаги тирналиш ва бошқа изларини яширади ҳамда жилоси тикланади. Салон топ-тоза бўлишига эътибор қаратинг. Харидорнинг иштиёқини сўндирадиган нарса чанг босган ва ифлос салондир. Бир хил кўрсаткичларга эга, аммо тоза автомобиль 2-3 миллион ошиқроқ нархга сотилгани ҳолатлари бўлган. Албатта, бу билан салонга қимматбаҳо чарм қоплаб бозорга олиб чиқишни таъкидламаяпмиз.

Куйиб қолган чироқчаларини алмаштиринг, тиқинчалар (заглушка) жой-жойида бўлсин. Эшик қулфи расо ишлаши керак. Эҳтиёж бўлса, аккумуляторни тўйинтиринг, двигателдаги ёғ миқдори талаб даражасида бўлсин. Буларнинг ҳаммаси харидорнинг диққатини тортиш ва кўнглини олиш учундир.

3. Машина олди-соттиси эълонлари қўйиладиган сайтлар орқали сотишни мўлжаллаётган бўлсангиз, машинингизни кўркам ҳолатда суратга олинг. Яхшиси, ювгандан сўнг дарҳол расмга олишдир, чунки кирланиб улгурмайди, айниқса қишда. Об-ҳаво айниган маҳалда ёки қуюқ булутли ҳавода расмга олманг. Қуёш нури ёрқин бўлиши, етарлича ёритилганлик шароитида расмга олиш керак. Орқа фонда чиқинди, гўнг, хароб иншоот сингари негатив ҳиссиёт уйғотувчи объектлар бўлмаслиги керак.

Яхши расм

Ёмон расм

Одатда 7 хил вазиятдан суратга олинади: олдидан (чап ва ўнгидан), орқадан (чап ва ўнгидан), олд панель (орқа ўриндиқда ўтириб суратга туширилади), юкхона ва орқа ўриндиқлар. Бу суратларни томоша қилган харидор автомобилни тўла кўздан кечиргандек бўлиши керак. Юқори сифатли фотоаппаратдан фойдаланиш лозимлигини ҳисобга олинг, замонавий смартфон ҳам бўлаверади.

4. Янги сим-карта ёки энг арзон телефон сотиб олинг. Бу вақтинча амал бўлиб, сотиб юборгач, машинангиз янги эгасининг турли ортиқча саволларидан ҳимояланасиз. Олибсотарлар безовта қилишидан ҳам қутуласиз.

5. Сотиш ҳақидаги эълонни тўғри тузинг. Қисқа ва лўнда бўлсин. GMнинг янги маркасини “руль гидравлика” деб таърифлаш ёки Ласеттининг 3-позициясини автомат қутилигини таъкидлаш шарт эмас, буни, деярли, ҳамма билади. Аммо автомобилингизнинг муҳим ҳисобланган жиҳатларини айтиб ўтиш керак, масалан, машинангизнинг навигация тизими бўлса урғулашга арзийди.

Нима қилмаслик керак?

Маблағ сарфлаб кузовни таъмирлатишнинг ҳожати йўқ. Яхши сотилса сарфланган пулингизни чиқариб оласиз холос. Машинани таъмирлаб сотувчилар – бошқа одамлардир.

Бошдан-оёқ техник таъмирлаб чиқишнинг мутлақо зарурияти йўқ. Тормоз дисклари ва колодкаси, қиммат турадиган юриш қисмларини оламжаҳон пул сарфлаб тузаттиргандан кўра, харидорга шу маблағнинг бир қисмини чегирма қилинг – хурсанд бўлади.

Моторни ювиш керак эмас. Фалон йилдан бери машинани миниб келасиз, аммо двигатель ярақлаб турибди…ҳмм…  Харидор шубҳаланиши тайин.

Автомобилингизга навигация тизими, томига юкхона ва бошқа жиҳозлар ўрнатган бўлсангиз, қўшиб сотган тақдирда улар умумий нархга таъсир қилмайди. Ечиб олиб қолганингиз яхшироқ.

Оилангизнинг яқин аъзосига айланиб қолган машинани ҳам сотмаганингиз дуруст. Одатда, бундай ҳолда эски автомобиллар назарда тутилади. Оилавий муносабатларга дарз кетишининг олдини олган бўласиз.

Шу билан бирга carzone.uz сайтида эълон беришингиз мумкинлигини эслатиб ўтамиз. Бунинг учун махсус эълонлар бўлимини яқин орада ишга тушириш ниятимиз бор. Сайтимизни кузатиб боринг.