Rolls−Royce Женевада олмос қўшиб бўялган автомобилни кўрсатади

Rolls−Royce Ghost седанидаги нафис митти Elegance ҳайкалчасини алоҳида таъкидлаб ўтишимиз лозим. У шахсий коллекционерга тегишлидир.

“Роллс-Ройс”чилар Ghost Elegance олмосли бўёқ билан ишлов берилган дунёдаги биринчи автомобиль эканлигини ғурурланиб таъкидламоқда. Мутахассислар туйилган олмосдан махсус қоплама тайёрлаган. Бу қоплама тусига “Diamond Stardust” деб ном берилган бўлиб, “олмосларнинг юлдузли чанги” маъносини англатади.

Бўёқ эса минг олмосни махсус усулда қайта ишлаб тайёрланган. Даставвал, қимматбаҳо тошлар синчиклаб экспертизадан ўтказилган, сўнг икки ой мобайнида уларнинг нур ўтказиш ва акс эттириш хусусияти синаб кўрилган.

Шундай қилиб олмос кукуни аралаштирилган бўёқ автомобилга пуркалган. Сўнг олмос зарраларини механик таъсирдан муҳофазалаш мақсадида машина сиртига қўшимча лак сурилган. Сайқаллаш билан биргаликда бу ишлар 2-3 кун вақт олган.

Rolls-Royce Ghost Elegance салонида ҳайдовчи ва йўловчи бўлмаси алоҳида ажратилган. Ҳайдовчи кабинасида қора чарм сирилган ўриндиқлар ва четидаги нафис ҳошияларга кўзингиз тушади. Йўловчи ўтирадиган ўриндиққа эса кулранг чарм қопланган ҳамда қизил ранг билан ҳошияланган. Эшиклардаги чўнтаклар эгасининг севимли материали рангли тартандан (синтетик материал) тайёрланган.