Сентябрда Канада компанияси Solo электрокарини тақдим этади

Канаданинг Electra Meccanica компанияси уч ғилдиракли ностандарт электромобиль ишлаб чиқариши кимнинг хаёлига келибди дейсиз. Электромобиль худди ярми кесиб олинганга ўхшайди, бунинг устига олд ғилдираклари иккита, орқа ғилдираги эса битта. Компания унга таяниб автомобиль бозорида ўз ўрнини эгалламоқчи.

Мижозлар олдиндан буюртма беришни бошлади. Тўғри, компания вакиллари улар сонини ошкор этганича йўқ. Албатта, буни “Тесла”нинг ютуқларига қиёслаб бўлмайди, аммо Solo деганлари омманинг қизиқишини уйғотгани бор гап.

Solo салонига фақат бир киши сиғади. Электр двигателининг айлантириш моменти 188 Н•м. Аккумуляторининг сиғими 8,64 кВт•соат. Машина узунлиги 3,1 м, вазни эса 450 кг.

Юз тезликка 8 сонияда эришади, энг юқори тезлиги соатига 130 км. Аккумулятор тўла заряди билан 160 км йўл босади. 11 В кучланишда зарядлаш 6 соат вақтни олади (мос ҳолда 220 В кучланишда 3 соат).

Машина баҳоси 15 359 доллар.