19 апрел — ВАЗ-2101 туғилган кун

46 йил муқаддам АвтоВАЗ корхонаси биринчи автомобилини чиқаришни бошлаган. 1970 йилнинг 19 апрелида олтита ВАЗ-2101 русуми илк марта конвейердан чиққан. Бу автомобиль ҳаммаси бўлиб 5 млнга яқин ишлаб чиқарилган. ВАЗ-2101 собиқ Иттифоқ ва Россиянинг энг оммалашган автомобили ҳисобланади.

Агар “Жигули” оиласига мансуб автомобиллар жами 17,6 млн нусха сотилганини эътиборга олсак (бунга Украина ва Мисрда ишлаб чиқарилганлари ҳам киради), бу натижа жаҳон автосаноатидаги иккинчи кўрсаткичдир. Биринчи ўринда 21,5 млн дона сотилган Фолксваген Жук, учинчи ўринда эса 16,5 млн сотилган Ford T русумидир.

ВАЗ-2101 “Фиат-124” платформасида ясалган. Совет инженерлари асос автомобилга 800дан ортиқ ўзгаришлар киритган. Биринчи Жигулининг ишлаб чиқарилиши совет автосаноати тараққиётида катта қадам бўлди. Металлургия, нефт кимёси, электроника сингари стратегик муҳим соҳалар вазифаларини белгилаб берди.

“Нол бир” аҳоли орасида машҳур вақтида “якка” деб аташган, ундан яхшироқ русумлар чиқарилганда эса “бир тийинлик” номини олган.