2016 йилнинг энг яхши двигателлари аниқланди

Американинг таниқли Wards Auto журнали тугаётган йилнинг энг яхши ўн двигателини аниқлади. Журнал эксперт ва таҳлилчилари 23 йил мобайнида биринчи марта “Wards 10 Best Engines” рейтингида саккиз цилиндрли мотор кузатилмаганини қайд этишди. Ғолибларни тақдирлаш маросими 2017 йилнинг 11 январида Детройтдаги автокўргазма доирасида бўлиб ўтади.

V8 моторнинг ўрнини 6 цилиндрли турбодвигатель эгаллади. Рейтинг етакчиларининг еттитаси турболашган ва учтаси гибрид двигателлардир. Wards Auto журналида ёзилишича, дунёда автомобиль двигателининг ҳажми тобора қисқариб, турбо ва гибрид двигателларга ўтиш тенденцияси кетяпти.

Энг яхши ўн двигатель октябр ва ноябр ойларидаги тест-драйвлар асосида танланди. Ғолибликка 40 даъвогар бор эди. Моторларнинг қуввати, тежамкорлиги, айлантириш моменти, вибрацияси ва шовқини ҳамда замонавий технологиялар қўлланганлиги каби кўрсаткичлари баҳоланди. Шимолий Америка автобозорида 62 минг доллардан юқори бўлмаган нархда сотиладиган машиналарнинг моторларигина танловда қатнашганини айтиб ўтиш жоиз.

Ford Focus RS автомобилининг 2,3 литрли, 4 цилиндрли мотори энг яхши мотор деб топилди. Маҳсулдорлик ва тежамкорлик бўйича 2 литрли, 4 цилиндрли, 212 от кучига эга бўлган Hybrid Accor двигателига етадигани топилмади. Ҳар бир литр ҳажмига мос келувчи қувват борасида Volvo V60 Polestar энг яхшиси деб топилди (1 литрга 184 о.к.).

“Wards 10 Best Engines 2017” танловининг энг яхши ўн двигатели (алфавит тартибида).

• 3.0 Turbocharged DOHC 6 (BMW M240i)
• 1.5 DOHC 4/Dual Motor EREV (Chevrolet Volt)
• 3.6 DOHC V6/Dual Motor PHEV (Chrysler Pacifica Hybrid)
• 2.3 Turbocharged DOHC 4 (Ford Focus RS)
• 2.0 DOHC 4/Dual Motor HEV (Honda Accord Hybrid)
• 1.4 Turbocharged DOHC 4 (Hyundai Elantra Eco)
• 3.0 Turbocharged DOHC V6 (Infiniti Q50)
• 2.5 Turbocharged DOHC 4 (Mazda CX-9)
• 2.0 Turbocharged DOHC 4 (Mercedes-Benz C300)
• 2.0 Turbo/Supercharged DOHC 4 (Volvo V60 Polestar)