Agrotechsystem кичик самосваллар ишлаб чиқаришни ўзлаштиради

Қишлоқ хўжалиги мини-техникаларини ишлаб чиқаришга ихтисослашган Agrotechsystem корхонаси келгуси йил охиригача уч ғилдиракли самовал ишлаб чиқаришни ўзлаштирмоқчи, деб хабар беради sputniknews-uz.com. Ағдарма машина боғлар ва токзорларда ишлашга мўлжалланган.

2007 йилдан иш бошлаган корхона “Чимён” бренди остида қуввати 26дан 44 от кучигача бўлган 12 турдаги мини-тракторларни ишлаб чиқаради. Бу тракторлар кичик фермер хўжаликларида фойдаланилмоқда. Корхона маҳсулотлари қаторига турли модификациядаги мини-комбайнлар ва тиркама техникаларини ҳам қўшиш мумкин.

Корхона вакилининг айтишига кўра, даставвал, троекар номли уч ғилдиракли самосвални йиғиш бошланади. Сўнг кузов, ойна, шина сингари қисмларини мамлакатда ишлаб чиқариш режалаштирилмоқда. Биринчи босқичда 2016 йил охирига қадар 15 дона самосвал чиқарилади ва талабга қараб ишлаб чиқариш ҳажми оширилиши мумкин. Самосвал андозаси Хитойники, мотор Япония маҳсулоти.

Самосвал уч ғилдираклиги сабаб токзорларни культивациялаш ва ҳосил йиғиш ишларида қўл келади. Энг кўпи билан 2 тонна юк кўтара олади.

Agrotechsystem Ўзбекистон-Хитой-Россия қўшма корхонасидир. 8 йилдан бери Ўзбекистонда фаолият юритади.