«АвтоВАЗ» йўлтанламас «Веста»ни намойиш этди

«АвтоВАЗ» Lada Vesta Concept Cross номини олган йўлтанламас универсалнинг концептуал талқинини намойиш этди. Прототипнинг омма олдидаги премьераси 26 август, чоршанба куни, йўлтанламас ва вездеходларнинг Москва шаҳрида бўлиб ўтган Moscow Off-Road Show кўргазмаси доирасида бўлиб ўтди.

Волга автомобиль заводи вакилларининг сўзларига кўра, янги автомобилнинг конструкциясида 320 та уникал деталлардан фойдаланилган. Универсалнинг сериялаб ишлаб чиқариладиган вариантини тайёрлаш учун завод мутахассисларига узоғи билан бир йил керак бўлади.

«Бундай автомобилни сериялаб ишлаб чиқариш эҳтимоли бор, бироқ муддатлар ва техник тавсифлар ҳақида гапиришга ҳали эрта», — дея қайд этди «АвтоВАЗ» президенти Бу Андерссон. Волга автомобиль заводи раҳбарининг қайд этишича, ҳозирги вақтда Vesta Cross «истеъмолчиларнинг муносабатини ўрганиш воситаси» бўлиб, унинг кейинги ривожига шунга боғлиқ.

Lada Vesta оиласининг илк вакили седан бўлади, уни оммавий ишлаб чиқариш ишлари сентябрь ойида бошланади. Мазкур автомобиль, Renault-Nissan альянси машиналарининг баъзи компонентларини татбиқ этган ҳолда, «АвтоВАЗ»нинг ўз кучи ҳисобидан ишлаб чиқилган. «Весталар» қуввати 87, 106 ва 114 от кучига тенг, ҳажми 1,6 литр бўлган двигателлар билан сотувга чиқарилади. Трансмиссияси эса уч хил кўринишда — «механика», «робот» ва «вариатор» бўлади.