Баённома тузилганидан кейин автомашинани жарима майдонига қўйиш шартми?
Савол: — ЙПХ ходими мени тўхтатиб, “Машина ойналари меъёридан ортиқ қорайтирилган”, деди ва маъмурий баённома тузиб, транспорт воситасини жарима майдонига қўйди. Шу тўғрими? Баённома тузилганидан кейин автомашинани жарима майдонига қўйиш шартми?
Жавоб: — “Йўл ҳаракати қоидалари”нинг 3-иловаси — “Транспорт воситаларидан фойдаланишни тақиқловчи шартлар”нинг тегишли бандларига асосан, яъни “7.3. Ҳайдовчининг жойидан теварак-артоф кўринишини чеклайдиган қўшимча нарсалар ўрнатилган ва қопламалар туширилган бўлса” ёки “7.4. Барча транспорт воситаларининг олд, ён ва орқа ойналарининг ёруғлик ўтказувчанлиги 70% дан кам бўлса (автомобилнинг томидаги ойнаси бундан мустано)” ЙПХ инспектори бу ҳақда маъмурий баённома расмийлаштиради ва автомашинани вақтинчалик жарима майдонига қўяди. Ўзбекистон Республикаси Маъмурий жавобгарлик тўғрисидаги Кодекснинг 291-моддасига асосан, транспорт воситаларини ушлаб туриш бунинг сабаблари бартараф этилгунича ва маъмурий ҳуқуқбузарлик тўғрисидаги иш кўрилгунга қадар амалга оширилиши мумкин.
«Avto Plyus» газетаси билан ҳамкорликда тайёрланди