BMW i3 электрокарининг йўл захираси оширилди

BMW компанияси i3 электрокарини юқори сиғимли аккумляторларнинг модернизация қилинган тўплами билан таъминлади. Motor.ru’нинг ёзишича, янгиланган батареялар блоки йўл захирасини 50 фоизга ошириш имконини берди.

Samsung компанияси билан ҳамкорликда ишлаб чиқилган батареялар сиғими 22 киловатт-соатдан 33 киловатт соатгача ўсди. Энди электрокар бир марта тўлиқ қувватлантирилганидан сўнг 300 километр йўл боса олади, аввал бу кўрсаткич 160—190 километрга тенг эди. Компания вакилларининг сўзларига кўра, совуқ иқлим шароити ва кондиционер ишлаб турган вақтда ҳам электрокарнинг йўл захираси 200 километрдан кам бўлмайди.

Аккумляторларнинг янги тўплами автомобилнинг 170 от кучига эга тўлиқ электр-версия моделида ҳам, батареялар билан қувватлантириш хоссасига эга қўшимча икки цилиндрли (ДВСли) модификацияда ҳам таклиф қилинади. Иккинчи ҳолатдаги ҳажми 647 куб сантиметрлик бензин мотор йўл захирасини 150 километрга оширади.

Янги батареялар блоки аввалги ўлчамларини сақлаб қолгани билан, оғирлиги 50 килограммга кўпайди. Электр BMW i3 7,3 сонияда соатига 100 километрлик тезликка эриша олади, ДВСли кўриниши эса 8,3 сонияда бу кўрсаткични қайд эта олади. Ҳар иккала ҳолатда машиналарнинг энг юқори тезлиги соатига 150 километр билан чекланган.

Германияда янги аккумляторли BMW i3’ларнинг нархи 36 минг 150 евродан бошланади, бензин ҳисобига йўл захирасини кўпайтира оладиган версиясининг энг арзони эса 41 минг 150 еврога баҳоланмоқда.