Британиянинг экокар ишлаб чиқарувчи компанияси яна икки модель ҳақида ваъда берди

Водородли Rasa экомобилни ишлаб чиқиш устида ишлаётган Британиянинг Riversimple компанияси яна икки янги моделни тайёрлайди, дея хабар бермоқда “Мотор”.

Ҳар икки модель Riversimple’нинг биринчи автомобили услубида ишланади — биринчи модель ишланмаси учун Fiat 500 дизайни муаллифи Крис Райтц масъул бўлган эди.

Биринчи модель Citroen DS’нинг оригиналини ёдга солувчи сиймога эга седан бўлади. Иккинчи янги машина эса орқа ғилдираклари ёпиқ ва кузови аэродинамик кичик фургондир.

Тахминларга кўра, вазни оғирлиги сабаб уларнинг йўл захираси Rasa’никидан камроқ бўлади — Rasa бир марта тўлиқ қувватлантирилганидан сўнг, 483 километр йўл боса олади.

Айни вақтда, Riversimple двигателларининг янада такомиллаштирилиши натижасида машинанинг тежамкорлиги янада ўсиши мумкин.

Икки ўринли Riversimple Rasa автомобили тақдимоти 2016 йил февралида бўлиб ўтган эди. Модель алюминий подрамникли пластик монокок ва шиша толадан тайёрланган кузов панелларидан қурилган. Автомобилнинг оғирлиги 580 килограмм.

Rasa тўртта электромотор билан таъминланган бўлиб (ҳар бир ғилдиракда биттадан), улар қуввати 8,5 киловатт бўлган ёнилғи ячейкалари тўпламидан қувват олади. Энергия водород ва кислород реакцияси натижасида ажралиб чиқади.

Экомобиль 10 сония ичида соатига 96 километрлик тезликка эриша олади. Машинанинг энг юқори тезлиги ҳам айнан 96 километр/соат билан чекланган.

2016 йил охирига яқин Riversimple сериялаб ишлаб чиқариш арафасида 20 автомобилни “бета-синов” учун жисмоний шахсларга тарқатади. Синовлар 2017 йилда ҳам давом этади, машиналар сотуви эса 2018 йилда бошланиши кутилмоқда.