Дунёдаги энг кичик машина 176 минг долларга сотилди (видео)

Буюк Британияда 1962-1965 йилларда ишлаб чиқарилган уч ғилдиракли Peel P50 микрокарининг бир нусхаси Флоридада бўлиб ўтган RM Sotheby’s аукционида ўз харидорини топди. Ўз номини ошкор қилмаган талабгор “дунёдаги энг кичик” деб топилган автомобиль учун 176 минг доллар тўлашга рози бўлди.

Хабарларга кўра, айнан ушбу машина бугунги кунгача сақланиб қолган 26та Peel P50 автомобилидан бири ҳисобланади. Жами бўлиб эса машинанинг 47та нусхаси ишлаб чиқарилган. Аукционда сотилган автомобилнинг аввалги эгасининг америкалик коллекционер экани айтилмоқда.

Peel P50 автомобиллари шуҳрати Top Gear шоуси шарафи билан оламга ёйилди. Мазкур шоунинг 2007 йилдаги ўнинчи мавсумининг учинчи қисмида Жереми Кларксон айни шу машинада ВВС идорасига боради.

Уч ғилдиракли автомобиль 46 куб сантиметр ҳажмли 4,5 от кучига эга мотоцикл мотори ва орқага ҳаракатланмайдиган уч босқичли тезлик узатмалар қутиси билан таъминлаган. Peel P50`ни орқага қайтариш учун ҳайдовчи кабинани тарк этиб, 59 килограммлик машинани қўлда ҳаракатлантириши талаб қилинган.