Ferrari P4 репликаси 850 000 долларга баҳоланди

1967 йилда Ferrari компанияси Ford GT’га жавоб тариқасида 330 P4 моделини тайёрлайди. Янги автомобиль ўтмишдоши P3’га қараганда бир мунча кучли ва тезкор моделга айланади. Автомобилдаги V12 двигатели 450 та от кучига эга бўлган (335 кВт). Ўша йили Ferrari P4 Монца шаҳрида ўтказилган пойгада ғалаба қозонади. Бор-йўғи тўрт дона ишлаб чиқарилган мазкур автомобиль маркасидаги 3 та модель 1967 йилда Дейтонда бўлиб ўтган 24 соатли пойгада бир йўла фахрли 3 ўринни эгаллашади. Орадан икки йил ўтгач, P4 ўрнини Ferrari 312 P моделига бўшатиб беради. Яратилган тўртта нусха эса коллекционерларга сотиб юборилади.

Бироқ ҳозирда eBay аукционида таклиф этилаётган автомобиль айнан ўша нусхаларнинг бири эмас. Аукциондаги модель P4’нинг Norwood (АҚШ) компанияси томонидан тайёрланган репликасидир. Бироқ ушбу репликанинг ҳам нархи осмонда. Автомобилнинг аукциондаги бошланғич нархи 850 000 доллар этиб белгиланган.

Репликага 500 от кучига эга (372 кВт) Motec электрон блоки билан таъминланган Ferrari 575 V12 мотори ўрнатилган. Автомобилнинг қолган барча элементлари 1967 йилдаги оригинал  P4 моделига ўхшаш. Қўлда ишланган хромланган қувурли пўлат шасси Энцо Феррарининг оригинал дизайнини такрорлайди. Барча суюқлик резервуарлари альюминийдан тайёрланган, тилларанг ғилдираклар эса магнийдан ишланган. Реплика Техасда рўйхатда ўтказилган бўлиб, умумий йўлларда ҳаракатланишга яроқли, деб топилган.