Ford Focus универсали йўлтанламас талқинига эга бўлиши мумкин

Яқин уч йилда Ford компанияси мавжуд учта моделнинг йўлтанламас модификациясини ишлаб чиқаришни режалаштирмоқда. Янги талқинлар кузови пластикли ҳимоя, рейлинглар, кенгайтирилган криланс ва бошқа афзалликларга эга бўлади. Бу ҳақда Британиянинг Autocar нашрига таянган ҳолда auto.mail.ru хабар бермоқда.

Компаниянинг Европа бўлинмаси вице президенти Барб Самардзич айнан қайси моделлар йўлтанламас талқинига эга бўлиши масаласига тўлиқ ойдинлик киритмаган, бироқ у кроссоверлик қиёфасини тасаввур қилиб бўлмайдиган автомобиллар ҳам, масалан Fiesta ана шундай талқинга эга бўлиши мумкинлигига ишора қилиб ўтган.

Нашр журналистларининг қайд этишича, Ford Fiesta`дан ташқари Ford Mondeo универсали ҳам йўлтанламасга айланиши мумкин. Бундай автомобилнинг олд ва орқа ғилдираклари илдамловчи бўлиб, Volkswagen Passat Alltrack`нинг тўғридан-тўғри рақобатчисига айланиши мумкин. Яна бир универсал — Ford Focus ҳам йўлтанламасга айланган тақдирда, Skoda Octavia Scout билан рақобатга киришади.

Ford автомобилларининг йўлтанламас талқинлари тўғрисида ҳозирча расмий ва батафсил маълумотлар берилгани йўқ.