“Форд”ларнинг энг узун автокарвони Гиннесснинг рекордлар китобидан ўрин олди
Болгариянинг София шаҳрида Ford русумидаги автомобиллардан ташкил топган энг узун автокарвон бўйича Гиннесс рекорди ўрнатилди. Рекорд ташкилотнинг махсус кузатувчилари томонидан расман қайд этилди.
Тадбир Болгарияда Ford, Volvo, Jaguar ва Land Rover русумидаги автомобилларни сотиш билан шуғулланувчи Moto-Phone компанияси томонидан уюштирилди.
3,2 километрга чўзилган автокарвон 20 километрча йўл босди. Карвонда нафақат замонавий “Форд”ларни, балки Thunderbird купеси, Cobra суперкари ва 30-йилларнинг Model A’си каби классик машиналарни ҳам кўриш мумкин эди.
Парадда жами 2,3 минг “Форд” қатнашди, бироқ якуний ҳисоботга фақат 1527 автомобиль киритилди, чунки қолган транспорт воситалари енгил машина сифатида рўйхатга олинмаган эди.
Бу 2014 йили АҚШда 829 машина иштирокида қайд этилган натижадан икки баробар кўпроқ. Бироқ бу Гиннесснинг рекордлар китобидан ўрин олган энг узун автокарвон эмас. Масалан, 2015 йил ёзида АҚШнинг Пенсильвания штатида 2420 дона Jeep йўлтанламасларининг паради бўлиб ўтган эди.