Ford янги Mustang`ни белгиланган муддатдан икки йил аввалроқ чиқарадиган бўлди

Ford компанияси янги авлод Mustang спорткари жадвал бўйича белгиланган муддатдан икки йил муқаддам ишлаб чиқаришини маълум қилди. Бу ҳақда Mustang6G форумига жойлаштирилган ҳужжатда сўз боради.

Унда қайд этилишича, моделнинг код рақами S550 дан S650 га ўзгартирилди, ишлаб чиқаришга киришиш муддати эса 2022 йилнинг қишидан 2020 йилнинг баҳорига қадар қисқартирилди.

Тахминларга кўра, “Форд” янги Mustang автомобилини ишлаб чиқаришни Chevrolet Camaro билан кечаётган кучли рақобат сабабли тезлаштирмоқда. Айни пайтда “Мустанг” Америка бозорида ўз тоифасидани энг оммабоп автомобиллигича қолмоқда. Бироқ унинг савдоси тобора тушиб, “Камаро”га эгалик қилиш истагидаги инсонлар сони ортиб бормоқда.

Хусусан, 2016 йилнинг январь ойида АҚШда 7,6 минг дона янги “Мустанг” сотилган бўлса, бу ўтган 2015 йилнинг худди шу даврига нисбатан 12,8 фоиз кам демакдир. Айни пайтда, Chevrolet Camaro автомобилидан 5,5 минг донаси ўз харидорини топган. Бу ўтган йилдаги кўрсаткичлардан 11,2 фоизга кўп натижа саналади.

АҚШда харидорларга 300 от кучига эга 3,7 литрли V6 атмосфера мотори ўрнатилган базавий Ford Mustang машинаси таклиф этилмоқда. Бундан ташқари, двигателлар қаторидан 310 от кучига эга 2,3 литр ҳажмли “турботўртталик”ли мотор ҳамда 5,2 литр ҳажмли 435 от кучини ўзида мужассамлаштирган V8 агрегати ҳам ўрин эгаллаган. Трансмиссия – олти босқичли “механика” ёки шунча диапазондаги “автомат”. Қўшимча тўлов эвазига харидорлар моделнинг саккиз цилинрдли 526 от кучига эга двигатель билан ҳаракатланадиган Shelby GT350 талқинини ҳам сотиб олишлари мумкин.