Французлар Toyota Hilux асосида пикап ясамоқчи

PSA концерни Жанубий Америка, Осиё ва Африка автобозорларида мавқеини мустаҳкамлаш пайида. Шу сабабли пикап ишлаб чиқаришни кучайтирмоқчи.

Аммо пикапни йўқдан бино қилиш ўзини оқламаслигини французлар тан олиб, Тойота билан ҳамкорликни йўлга қўймоқчи. Аниқроғи, Toyota Hilux ички ва ташқи қиёфаси бир оз ўзгартирилади, эҳтимол, французча мотор ўрнатилади  ва албатта, Peugeot ёки Citroen ёрлиғи билан харидорга тақдим этилади.

Нима учун французлар айнан Toyota Hiluxни танлаганлиги маълум эмас. Чунки уларнинг олдида Mitsubishi L200ни танлаш имкони бор эди, қолаверса, Mitsubishi ва PSA концерни алоқалари яхши йўлга қўйилган. Шундай қилиб, французлар яқин беш йил ичида етти гибрид русум ва тўрт электромобиль ишлаб чиқаради. Уларнинг аксарияти японлар билан ҳамкорликда яратилиши мумкин.

Эслатиб ўтамиз: PSA Peugeot Citroën автомобиль ишлаб чиқариш ҳажми бўйича Европада иккинчи ўриндаги концерн саналади. 1976 йилда ташкил топган бўлиб, қароргоҳи Парижда жойлашган.