Гитлернинг автомобили сотилмоқда

Январ ойида АҚШда Mercedes-Benz 770 Grosser Offener Tourenwagen автомобили кимошди савдосига қўйилади. Автомобиль фашистлар доҳийсининг буюртмасига биноан ясалган бўлиб, асосан тантанали намойишларда ундан фойдаланилган. Жумладан, 1940 йилда Берлиндаги ҳарбий намойишда ҳам у иштирок этган.

Германия таслим қилингандан сўнг машина Америка армияси ихтиёрига ўтган. У уммон ортига олиб кетилиб, бир неча бор қўлдан қўлга ўтган. Жумладан, Лас-Вегасдаги казино эгасиники ҳам бўлган.

Mercedes саккиз цилиндрли 7,7 литрли моторга эга, қуввати 230 от кучига тенг. Энг юқори тезлиги соатига 155 км. Қалинлиги 30 ммли олд ойнасини алоҳида таъкидлаб ўтамиз.

Айтиб ўтиш керакки, Mercedes-Benz 770 Grosser Offener Tourenwagen автомобили дунёда фақат беш нусха қолди. Товар нархи аукцион сайтида кўрсатилмаган, аммо қанчага сотилмасин пулининг 10 фоизи Холокост қурбонлари ҳисобига ўтказилади.