Honda Odyssey гибридга айланди

Honda компанияси гибрид агрегат ўрнатилган минивэнни намойиш қилди. Автомобиль японларнинг ўзи учун ишлаб чиқарилган, экспортга чиқарилиши номаълум.

Минивэннинг 2 литрли бензинли мотори ва электродвигатели ҳамда литий-ионли батареяси бор (қуввати 1,3 киловатт-соат). Автомобилнинг жами қуввати 180 от кучига тенг. Ўртача ёнилғи сарфи 100 кмга 3,8 литрдан ошмайди.

Айни кунларда Honda Odysseyнинг янги авлодини синаш ишлари билан банд. Тақдимот маросими шу йили ўтказилади. Аввалроқ автомобилнинг тўла узатмали бўлиши хабар қилинганди. Бундан ташқари, машина туби ердан 5-6 смга баландлашади.

Эслатиб ўтамиз: ўтган йили Honda компанияси Odyssey минивэнининг Special Edition номли янги версиясини тақдим этганди. Янги автомобиль русумлар сафида EX ва EX-L орасидан жой олган. Махсус версияда орқадаги йўловчилар учун кўнгилочар тизим жойлашган, 115 Вли розетка ва SiriusXM сунъий йўлдош радиоси бор. Шунингдек, минивэн юкхонасининг орқа қисмида чангюткичи ҳам мавжуд.