Hyundai рулдаги сенсор клавишлар учун патент олди

Hyundai компанияси АҚШда рул чамбарагига мўлжалланган ўз сенсорли клавишлари учун патент олди. Жанубий Корея компанияси ишланмаси қўлқоп билан босишни сеза олади, шунингдек, рулга унча катта бўлмаган дисплей ўрнатиш имкониятини назарда тутади.

Hyundai мазкур технологиясини Жанубий Кореянинг ўзида 2014 йилдаёқ патентлаштирган эди. Ишланма икки тачпад, дисплей, бошқарув блоки ва хотира қурилмасидан иборат. Унинг ўзига хосликларидан бири — жавобларни созлаш имконияти ва нотўғри босишларни нисбатан тўғри қила оладиган махсус “фильтр”дир.

Шунга ўхшаш технология янги авлод Mercedes-Benz E-Class, Toyota Prius ва Honda Civic моделларига татбиқ этилган. Сенсорли клавишлар рул чамбарагига шундай жойлаштирилганки, ҳайдовчи уларни катта бармоқлари билан бемалол боса олади. Бу клавишлар мультимедиа тизими менюси ва борт компьютерини тепага-пастга “варақлаш” имконини беради.

2016 йилнинг март ойида Hyundai АҚШда “ҳордиқ автомобиллари” (“recreational vehicle”) учун мўлжалланган эшикнинг янги турига патент олган эди. Ишланма орқа эшикларнинг икки кўринишини ўзида мужассам қилган: суриладиган ва “чайка қаноти”. Эшикни суриб, йўловчиларнинг чиқиши ва тушишини осонлаштириш мумкин, эшикларни юқорига кўтарганда эса юкларни ортиш ва тушириш қулайлашади.

2015 йилнинг апрель ойида Hyundai ҳайдовчи рулга ўтирганида мобиль телефонни ўчириб қўядиган ёки унинг маълум бир функцияларини чекловчи технологияни патентлаштирган эди. Мазкур тизим ҳайдовчини чалғитувчи омилларни камайтириб, йўл ҳаракати хавфсизлигини оширишга хизмат қилиши кўзда тутилган.