Ирландияда террорчилик автосаноатни ривожлантирган

Шимолий Ирландия ҳеч қачон Британия автосаноатининг маркази бўлмаган. Бу мавзуда фақатгина DeLorean ҳамда Crosslé ва TMC Costin майда фирмалари эсга олинади. Аммо зирҳли машина тайёрлашга ихтисослашган Shorland фирмаси ҳам бўлганлигини эсласак, жиноятчиликнинг автосаноат ривожига таъсирини сезамиз.

Ирландия республикаси армияси 1916 йилда ташкил топган, Иккинчи жаҳон урушидан сўнг мамлакатда террорчилик авж олди. Хусусан, Олстер провинциясида йилига юзлаб террорчилик ҳодисаси ва ҳарбий амалиёт ўтказиларди.

Shorland Mk III

Олстернинг Қироллик полицияси вазифасини уддалай олмасди, чунки техника ва қурол-яроғ етишмасди. Шунда майдонга ҳарбий инженер Фредерик Батлер чиқди ва 1961 йилда ҳарбийча зирҳли машинага айлантирилган Land Rover йўлтанламаси концептини намойиш этди. 1964 йилгача прототип такомиллаштирилди, 1966 йилдан эса Белфастда Land Rover Series IIA шассисидаги Shorland Mk I зирҳли автомобилини серияли равишда ишлаб чиқара бошланди.

Shorland Mk I

Машинани Белфастдаги Short Brothers авиазаводи ишлаб чиқарган. Завод 1908 йилда ташкил этилган бўлиб, ҳозиргача Шимолий Ирландиянинг йирик корхоналаридан бири саналади. Завод ҳозир Канаданинг йирик Bombardier компаниясига қарашли. Shorland бренди Short Brothers ва Land Roverнинг чатишмаси сифатида вужудга келди.

Shorland Mk V

Shorland зирҳли автомобиллари 1990 йилгача Олстер ҳудудида Қироллик полицияси ва армиянинг асосий жанговар машинаси эди. Машинанинг беш авлоди ишлаб чиқарилди. Охиргиси Mk 5 1985 йилдан ҳозиргача ишлатилиб келмоқда. Shorland зирҳли машиналари Олстердан ташқари дунёнинг ўнлаб мамлакатларида ишлаяпти. Юзлаб машинани турк жандармлиги харид қилган.

Нидерландия полицияси хизматидаги Shorland Mk III

Ирландиядаги таранг вазият юмшаши ва террорчилик даврининг тугаши боис Shorland чеккага сурила борди. Ўз ўрнини фуқаровийроқ Land Rover Tangi авторусумига бўшатиб берди.