Италияликлар BMW i8’га футуризм руҳини олиб кирди

Garage Italia Customs ательеси BMW компаниясининг Италиядаги бўлинмаси билан ҳамкорликда i8 спорт гибридининг махсус модификациясини тайёрлади. Futurism Edition номини олган автомобиль BMW’нинг Италиядаги фаолияти 50 йиллигига бағишлаб ишлаб чиқилган, дея хабар бермоқда Motor.ru.

BMW i8 кузовини қоплаган сурат италиялик рассом Жакомо Балла томонидан 1909 йилда чизилган “Кўча фонари” номли суратни ёдга солади. Мазкур сурат ҳозирда Нью-Йоркдаги Замонавий санъат музейида намойиш этилади.

Автомобилнинг юргизгичи ўзгармаган. Одатда BMW i8 машиналари ҳажми 1,5 литрли, 231 от кучига эга бензинли турбомотор, 131 от кучига эга электродвигатель, литийли аккумляторлар тўплами ва олти босқичли автомат тезлик узатмалар қутиси билан таъминланади. Бундай автомобиль 4,4 сонияда “юзга чиқади”, энг юқори тезлиги соатига 250 километр билан чекланган.

Garage Italia Customs тюнинг-ательеси Fiat компаниясининг собиқ бош маркетологи ва мазкур компанияни назорат қилувчи Аньелли оиласи аъзоси — Лапо Элканнага тегишли.