Jaguar 550 от кучига эга седан билан “реактив одам” пойгасини ташкил этди

Jaguar компанияси XJR седани ҳамда елкасига қанотли реактив халта таққан одам ўртасида пойга ташкил этди. Беллашув тасвирланган видеоролик ишлаб чиқарувчининг YouTube-каналида эълон қилинди.

Ушбу мусобақада “Ягуар”ни собиқ Формула-1 ҳайдовчиси Мартин Брандл бошқарган бўлса, узунлиги икки метрга тенг қанот ўрнатилган карбонли реактив халтада “реактив одам” номи билан машҳур швейцариялик учувчи Ив Росси беллашувга киришди. Мусобақа Дубай чўлидаги 2,81 километр узунликдаги йўлда ташкил этилди.

Беллашув мобайнида Брандл “Ягуар”нинг тезлигини соатига 280 километргача чиқара олган бўлса, Росси тезликни 313 километр/соатга етказди.

Jaguar XJR седани 5 литр, 8 цилиндрли наддувли мотор билан таъминланган бўлиб, унинг қуввати 550 от кучига тенг. Автомобиль двигатели саккиз босқичли автомат тезлик узатмалар қутиси билан биргаликда ҳаракатланади. Ушбу автомобиль “юзталик”ка 4,6 сония ичида чиқа олади. Унинг энг юқори тезлиги эса 280 километр/соатни ташкил этади.