Kia сифатлилик рейтингида Porscheдан ўзиб кетди

Америкалик экспертлар энг сифатли янги автомобиллар рейтингини тузди. Бундай рўйхат J.D. Power and Associates агентлиги томонидан 30-бор тузилмоқда.

Анъанага кўра автомобиль харид қилган кишиларнинг 90 кундан сўнг машина ҳақидаги фикрлари ўрганилди. Бу вақт мобайнида машинада юзага келган муаммоларга экспертлар эътибор қаратишди ва шу маълумотлар асосида носозлик индекси тузилди. Индекс ҳар 100 машинага нисбатан олинган. Тадқиқотда фақат 2016 йилда ишлаб чиқарилган автомобиллар иштирок этди. Тадқиқот жорий йилнинг февралидан мартигача ўтказилди, унда 80 мингдан ортиқ инсон қатнашди.

Иккинчи йилдирки, корейс авторусумлари энг яхши натижани кўрсатиб келмоқда. Ўтган йили Kia иккинчи, Porsche эса биринчи қаторда бўлса, жорий йилда корейс машинаси немис русумидан юқорига ўтиб олди.

Кузатишлар натижасига кўра, Kia 83 балл йиғиб биринчи ўринни банд қилди, Porsche эса 84 балл билан иккинчи ўринда. Учинчи қаторни ҳам корейс русуми Hyundai 92 балл билан эгаллади. J.D. Power and Associates эскпертлари янги автомобиллар сифати ўтган йилгидан 6 фоизга ўсганини қайд этди. Хусусан, АҚШнинг Chevrolet ва Jeep маркалари рўйхатда юқорига тез илгарилагани кузатилди.