Lada Niva: Германиядаги энг секин автомобиль

Focus номли немис нашри мамлакатдаги энг кам максимал тезликка эга бўлган автомобиллар рейтингини тузди.

Германия каби суперкарларга бой мамлакатда бундай автомобилларнинг бўлиши бироз ғалати туюлиши мумкин. Аммо бундай автомобиллар чиндан ҳам мамлакат ҳудудида талайгина экан.

Шундай қилиб Германия бозорида энг кам максимал тезликли янги автомобиль мақомини Lada Niva мустаҳкам сақлаб турибди. Ушбу модель Германияда Taiga бренди остида сотилади. Рус автоси 100 км/ст тезликка эришиш учун 19 сония сарфларкан, унинг максимум тезлиги эса 137 км/ст.

Энг секин машина рўйхатида иккинчи ўринни Suzuki Jimny банд этган. Япониялик “тойчоқ” ўз параметрлари билан Lada Niva’га анча яқин бўлса-да, ҳар ҳолда ундан сал тезроқ кўрсаткичга эга: у 100 км/ст тезликка 14 сонияда эришади, максимум тезлиги – 140 км/ст.

Рўйхатнинг кейинги ўринлари Ford Tourneo Connect, Volkswagen Multivan ва Renault Kangoo каби моделлларга насиб қилган.

Гарчи Lada Niva ушбу рейтингда биринчи ўринни эгаллаган бўлса-да, уни йўлтанламас автомобиль сифатидаги хусусиятларини кўпчилик немислар эътироф этишган.