Lamborghini Centenario: ҳайрат, ҳашам, ҳаракат

Аввалроқ Lamborghini Centenario Roadster моделининг тақдимоти ўтказилиши ҳақида хабар берган эдик. Компания Monterey Car Week автошоусида ушбу моделни намойиш қилди. Бу ҳақда motorauthority.com нашри хабар бермоқда.

Шу йилнинг март ойида бўлиб ўтган Женева автошоусида компания Lamborghini Centenario’нинг купесини тақдим қилиб, унинг родстер версиясини ҳам тайёрлаётгани тўғрисида маълумот бериб ўтганди.

Lamborghini Centenario жами 40 та нусхада (20 та купе, 20 та родстер) ишлаб чиқарилиши режалаштирилган.

Родстер варианти ҳам Lamborghini Centenario купеси каби 6,5 литрли 759 от кучига эга V-12 двигатель билан қувватланган. Ушбу двигатель родстерга 2,9 сонияда 100 км/соат тезликка эришишга имконият беради. Ҳар иккала версиянинг максимал тезлиги 350 км/соат.

Родстернинг корпуси тўлиқ графит толадан, каркассиз корпус ва бошқа қоплам турлари эса енгил вазнли қимматбаҳо материаллардан тайёрланган. Lamborghini Centenario купе вариантининг оғирлиги — 1570 кг. Родстер варианти ҳам деярли шунча вазн босиши айтилмоқда.

Аэродинамик элементлар ва орқа ғилдиракли бошқариш тизими родстернинг кучли томонларидан ҳисобланади. Юқори тезлик билан ҳаракатланганда, орқадаги шиналар бурилиш бурчагига мос йўналишда айланиб, ғилдирак базасининг тезлашишига хизмат қилади. Натижада ҳаракат барқарорлиги ва моделнинг реакцияси ортади. Секин ҳаракат пайтида эса бурилиш бурчагига қарама-қарши айланади ва бу орқали манёвр қилишда енгиллик яратади.

Салонга интернет алоқаси мавжуд ва Apple CarPlay иловаси ўрнатилган сенсорли тизим ўрнатилган. Эслатиб ўтамиз, ушбу модель компания асосчиси Ферруччо Ламборгинининг 100 ёшлик юбилейи шарафига тайёрланган.

Суперкарнинг бошланғич нархи купе версияси учун 1, 75 млн евро, родстер учун 2 млн еврони ташкил этади. Иккала версиядаги барча моделлар аллақачон сотилиб бўлинган.