Лос-Анжелесда Lamborghini Huracan намойиши бўлиб ўтади

Ноябрь ойида ўрталарида АҚШнинг Лос-Анжелес шаҳрида бўлиб ўтадиган моторшоуда Lamborghini компанияси орқа ғилдираклари етакловчи бўлган Huracan суперкари модификациясини намойиш этади. Бу ҳақда Британиянинг Autocar нашри ўз ахборот манбасига асосланган ҳолда хабар қилди.

Автомобилнинг янги намунаси стандарт моделлардан ташқи қиёфасининг шиддаткорлиги, камайтирилган вазни ва янада кучлироқ моторлари билан ажралиб туради.

Тахминларга кўра, купе чекланган – 250 ададда ишлаб чиқарилади, унинг савдоси эса 2016 йилнинг биринчи чорагидан бошланади.

Бир вақтнинг ўзида ҳам олд, ҳам орқа ғилдираклари илдамловчи бўлган Lamborghini Huracan купеси 2013 йил охирида намойиш этилган эди. Карбон-алюмин шасси асосида қурилган мазкур модел вазни 1422 килограммни ташкил этади. Суперкарга ўрнатилган 5,2 литр ҳажмга эга V10 мотори 610 от кучини ўзида мужассам қилган. Huracan 3,2 сонияда 100 километр/соат тезликка чиқа олади. Унинг энг юқори тезлиги эса соатига 325 километрни ташкил этади.

2014 йилнинг ёзида моделнинг пойга учун мўлжалланган намунаси пайдо бўлди. У LP 620-2 Super Trofeo номини олди. Орқа ғилдираклари илдамловчи бўлган суперкар худди ўша двигатель билан таъминланди, бироқ унинг қуввати 620 от кучига қадар кучайтирилди. Машина вазни эса 152 килограмм – 1270 килограммгача камайтирилди.