Машина эшигининг бутунлай янгича дизайни кўрсатилди

Автомобилнинг ошиқ-мошиқли эшиги орқага ёки олдинга қараб очилиши мумкин. “Дамас”никидек сурилиб ва “Тесла”никидек қуш қаноти каби тепага ёйилиб очиладиган вариантлари ҳам бор. Бундан бошқа яна қандай очилиши мумкин? Ўйлаб топиш қийин. Яқинда Rezvani компанияси намойиш этган янги суперкарнинг эшиги умуман бошқача очилиши билан ажралиб туради.

Суперкар номи Beast Alpha. У ихчамгина бўлиб, 884 кг тош босади. 96 км/соат тезликка етишиши учун 3,2 сония кифоя. Энг юқори тезлиги 281 км/соат. Аммо унинг эшиклари ўзига хос. Компания бу эшикни Sidewinder деб атади. Кўринишидан зўр, аммо фойдаланиш нуқтаи назаридан саволлар туғдиради. Унинг эшиклари орқага эмас, олдинга сирғалади.

Тўғри, бундай конструкция билан автотураргоҳда кам жой эгаллаш мумкиндир, бироқ эшик очилгандан барча механизм ташқарида қолиши-чи? Қолаверса, тротуар масаласи ҳам бор.

Айтганча, Beast Alpha 200 минг доллар туради.