Mercedes-Benz «аэродинамика бўйича чемпион»ни ишлаб чиқди

Mercedes-Benz компанияси Франкфурт автосалонига Concept IAA (Intelligent Aerodynamic Automobile) прототипини олиб келди. Немисларнинг таъкидлашича, улар «аэродинамика бўйича чемпион»ни ишлаб чиқишга муваффақ бўлди — автомобилнинг олд қисмидаги қаршилик коэффициенти 0,19га тенг.

Mercedes-Benz Concept IAA

Тўрт эшикли купенинг габарит узунлиги 5040 миллиметрга (аэродинамик режимда 5430 миллиметрга), кенглиги 1995 миллиметрга, баландлиги эса 1305 миллиметрга тенг. Ғилдираклар базасининг ўлчами 2795 миллиметрни ташкил этади.

Mercedes-Benz Concept IAA

Автомобиль соатига 80 километр тезлик билан ҳаракатланишни бошлаганидан сўнг, унинг орқа қисмидаги фаол элементлар ҳаракатга келиб, машина узунлигини 390 миллиметрга оширади. Айни вақтда олд бампердаги ёпинчиқлар ва радиатор панжарасидаги қалқончалар ишга тушиб, ҳаво оқимларини машина ости ва ғилдирак аркалари ёнидан ўтиб кетишини таъминлайди.

Mercedes-Benz Concept IAA

Concept IAA 279 от кучига эга гибрид двигатель билан таъминланган. Прототипнинг энг юқори тезлиги электроникада соатига 250 километр билан чекланган. Фақатгина электромоторга таянган ҳолда автомобиль 66 километр йўл боса олади.

Mercedes-Benz Concept IAA

Прототипнинг алоҳида тўрт ўриндиқ ўрнатилган салони Mercedes-Benz’нинг келажакдаги люкс моделларида фойдаланиладиган бир қатор ечимларни намойиш этишга йўналтирилган.

Mercedes-Benz Concept IAA

Машина катта марказий дисплейи бор мультимедиа мажмуаси ва функцияларни имо-ишоралар орқали бошқариш имконияти билан таъминланган. Бундан ташқари, ичкарида яна иккита монитор бўлиб, бири двигателнинг иши ҳақидаги маълумотларни, иккинчиси эса иқлим тизими созламаларини кўрсатиб туради.

Тахминларга кўра, Concept IAA’даги бир қатор техник ва дизайнерлик ечимлари S-Class ва CLS оилаларининг кейинги авлод моделларида пайдо бўлиши мумкин.